Шукерте огыл Иваново олаште «Играй, гармонь!» XV всероссийский фестиваль-конкурсышто Марий Эл гыч чолга гармончо А.Яйцов мастарлыкшым ончыктен, лауреат лийын пӧртылын.
Фестиваль кум кече шуйнен. Тушко элнан 25 субъектше гыч 300 участник чумырген. Иктышт куштымо семым шоктеныт, южышт калык мурым йоҥгалтарымышт дене ойыртемалтыныт гын, кумшышт уна-шамычым шке возымо мурышт дене палдареныт. Арсений Арсеньевич курыкмарий куштымо семым йоҥгалтарен.
– Мыланем чылажат пеш келшен. Ты гана кумылан шуко еҥ ушнен. Тиде фестиваль тыгак Иваново-Вознесенский губернийлан шўдӧ ий теммылан пӧлеклалтын. Саламлыме деч вара гала-концертыш ойыреныт. Мыят тушко логалынам. Такшым мыйым шукышт шарнат улмаш. «Марий Эл, молодец!» манын кычкыреныт. Мыят шке республик нерген шарныкташак тыршем. «Калыкна пеш пашаче, музыкальный, мийыза унала. Кундемна моткоч мотор, сылне», – манам. Лауреатыш лекше-влакым Российын заслуженный артистше Валерий Анатольевич Охапкин (снимкыште) саламлен, чапле сувенирым, шарнымашан пӧлекым кучыктен, – мане А.Яйцов.
Е.Эшкинина.
