РУБРИКИ

Пеледыш пайрем: Кажныже кумылымак савырен!

Моло ийла семынак теният Йошкар-Оласе рӱдӧ каныме паркыште «Кудо» конкурс эртаралте. 

Ты ганат тушто республикысе 12 район шке кундемже дене палдарыш. Мо оҥайже, тиде конкурсыш икымше гана Киров область гыч Кикнур район ушнен.

Кажныжын кудыжо мо дене гынат ойыртемалтше лийын. Мутлан, жюри член-влакын аклыме пашам тӱҥалме икымше кудо Звенигово районын ыле. Чыным ойлаш гын, кажне кудышко жюри веле огыл, тыгак кугу уна-влак: Марий Эл правительстве председательын икымше алмаштышыже Михаил Васютин, республикысе правительстве председательын алмаштышыже Юрий Сидыганов, айдемын праважым аралыме шотышто уполномоченный Лариса Яковлева, Марий Оньыжа Эдуард Александров, тӱвыра, печать да калык-влакын пашашт шотышто министр Константин Иванов, икмыняр моло – пурен лектыч. Чылаштымат икымше кудышто моткочак порын вашлиймышт  куандарыме шижалте. А Звенигово районын делегацийже чотак ямдылалт толын. Нуно вӱд да чодыра дене кылдалтше: пуым ыштыме, выньыкым пидме, колым кучымо, пӧчыжым погымо – йӱла-шамычым ончыктышт, чыла тидым ышташ тӱҥалме деч ончыч мом палыман, мом шотыш налман, мом йодын пелештыман – палдарышт. Да тиде кудо гыч иктат яра кид дене ыш лек – кажныштлан пӧлек шотеш у куэ выньыкым пуэн колтышт.

Кужэҥер район, мутлан, Семык пайрем дене палдарыш, Волжский район – сӱан кечын ӱдырым  каче суртыш ужатыме, Морко район «тӱвыт монча», Шернур район «У пучымыш» йӱлам ончыктышт. Арам огыт пытартышыштыже могай-гына шӱраш гыч кӱэштме когыльо ден шолтымо пучымыш дене ышт сийле?! Кажне гаяк кудын шке кумдыкшым сурт-оралте коклаште, озанлык пашаште кучылталтше ӱзгар ден арвер-влак, ожнысо да кызытсе вургем, тӱр, моло ойыртемалтше кидпаша дене сӧралын сылнештараш тыршымыже палдырныш.

Морко район эсогыл лӱмынак пу гыч нӧрепым ыштен конден. Тиде веле мо? Морко памашышт гыч вӱдым конден, тудын кӧргышкыжӧ кугу ате дене  вераҥденыт ыле да уна-шамычлан тудым подылалаш темленыт. Туштак ӱдырамаш-шамыч иктышт вынерым куэн, весышт тӱрлен шинченыт. Ӱстел чесыштат поян лийын.

Советский районын кудыжо тӱрлӧ кидпаша дене веле огыл сымыстарен, тыгак ӱстелже марий, руш, татар калыкын национальный кочкышыштлан моткочак поян ыле. Такшым ик районымат шылталаш огеш лий – кажнын  ӱстебалже чеслан поян улмо дене ойыртемалтын. Мелна, туара, тӱрлӧ когыльо, пура, моло кочкыш – ончен, шинча шарлен, тамлен, мӱшкыр утыжденат темын.

Медведево районын делегацийже кугу уна-шамычым поснак чот ончен моштыш, коеш. Вет тудын кудыштыжо мурым йоҥгалтараш тӱҥалмекышт,  шукынжо марла кушташ лектыч. Марла нигунам куштыдымыжат! Санденак тиде кудо деке лишемше калык Константин Ивановын, Юрий Сидыгановын, Сергей Казанковын, молын моткочак тыршен, уло чоныштымак пыштен тавалтымыштым, пытартышлан Михаил Васютинын куштен лекмыжым ӧрын-куанен, совым кырен ончыш.

Жюрин иктешлымашыж почеш, «Кудо» конкурсышто

—  гран-при дене Морко район палемдалте.

— Икымше верым Медведево район сеҥен нале.

Кокымшо вер дене Звенигово район палемдалте.

— Кумшо верыш Волжский район лекте.

Призан верыш логалше-влаклан чылаштланат шергакан пӧлекым кучыктышт. Тыгак тений тиде конкурсыш могай район ушнен, кажныже  мӧҥгышкыжӧ пӧлек денак кайыш.

Любовь Камалетдинова.
Республикысе марий тӱвыра рӱдерын сайтеше гыч налме фото.

Опубликовать в Одноклассники

Добавить комментарий