УВЕР ЙОГЫН

Суд зал гыч: Марий Элысе ончычсо спорт министрым полномочийже дене утыжден пайдаланымылан титаклалтыт

Марий Элын ончычсо спорт министржылан, 52 ияш Сергей Киверинлан, да  Марий Эл Республикын спорт сооружений управленийжын ончычсо директоржылан, 48 ияш Михаил Симаковлан, суд приговорым луктын. Нуно коктынат коклазе лиймыштлан да должностной полномочийышт дене утыжден пайдаланымылан титаклалтыт.  

Ушештарена, Сергей Киверин ӱмаште майыште Марий Эл Республикын спорт сооружений управленийжын тунамсе  директоржо Михаил Симаковлан пашадарым 36570 теҥге гыч 72660 теҥге марте, тӱҥ бухгалтерлан 32860 гыч 56600 теҥге марте кугемдышаш нерген документым эртыше кече дене оформитлен. А Михаил Симаков учрежденийын штатный расписанийышкыже  «коммерческий директор» должностьым пуртен да тиде пашашке Сергей Кивериным налын. Тудлан 60 тӱжем теҥге окладым ыштен. Тиде амал дене Спорт сооружений управленийлан 431 тӱжем утла тенгеаш эҥгек ышталтын.

Сергей Киверинлан суд 50000 теҥге, Михаил Симаковлан 60000 теҥге штрафым тӱлыкташ пунчалым луктын. Тыгак нунылан ыштыме эҥгек кугытыштым пӧртылтыктеныт.

Тений апрель мучаште Йошкар-Олан судшо Сергей Кивериным 2 ийлан эрык деч посна условно кодаш да 2 ият 6 тылзылан посна должностьлаште пашам ышташ чарыме нерген пунчалым луктын.

Л.Камалетдинова.

Опубликовать в Одноклассники

Добавить комментарий