Икмыняр ий ончыч Волжский районысо икмыняр ялыште у фельдшер-акушер пункт пашам ышташ тӱҥалын. Купсола кундемыште илыше-влакат ынде кум ий у ФАП-ыш коштеш. Тудо ялыш пурымаште, шола велне верланен. Туддеч мӱндырнӧ огыл верысе администраций, школ, йочасад, почто, клуб улыт.
Купсола фельдшер-акушер пунктым кызыт Юлия Смелова вуйлата. Тушто йоча да кугыеҥ-влаклан врач дене вашлияш посна, акушер, процедур, прививкым ыштыме, физиоэмлалтмаш кабинет-влак улыт.
— Мемнан деке кечылан иктаж 10-15 еҥ коштеш. Тиддеч посна уколыш, системыш толын каят, пашаж дене палдара самырык фельдшер Ю.Смелова. — Шукынжо давлений але капкыл температур кӱзымеке полышым йодыт, южгунам пий пурлеш ма але кокша лектеш, иктаж вес семын эмганат — пидыкташ толыт. Юмылан тау, икымше полышым пуаш чыла медикаментна уло.
Юлия — Купсола ялыштак шочын-кушкын, тышкак марлан лектын. Верысе школ деч вара Йошкар-Оласе медицине колледжым тунем лектын. Туддеч вара ӱдыр Волжскысо наркологийыште идалык утла пашам ыштен.
— Волжскыш кажне кечын кудалышташ шийвундо шагал огыл кая, сандене ялыштынак паша верым муаш шоненам, — ойла самырык фельдшер. — Шке кундемыште чылан палыме улыт, сандене куштылгырак.
Но вес могырым ончалаш гын, ялысе фельдшерын пашажым чылт куштылгыжак манаш огеш лий, вет ик еҥлан врачат, хирургат, окулистат да моло специалистат лийын моштыман. Южгунамже эсогыл психологат лияшыже логалеш, вет ойго дене толшо еҥым колыштын, умылен моштыман.
— Такшым самырык еҥлан вуйлатыше лияш тиде — кугу ответственность. Мыйын деч ончыч тиде пашам Людмила Михайловна Никитина шуктен. Тудо кайымыж деч ончыч мыйым шукылан туныктен коден, — тауштымо семын палемдыш Юлия. — Южгунам яллашкат икымше полышым пуаш лекташ логалеш. Тыгай годым кугурак-влакын ойлымыштым шарналтем. Поснак ньога-влакын капкыл температур, а илалшырак-шамычын давлений кӱзымӧ тургыжланаш тарата. Эпиприступ годымат икымше полышым пуаш логалын. Черлылан ситышын полышым пуэн огына кертла чучеш гын, «Вашкеполышым» Волжск гыч ӱжына.
Купсола ФАП-ыш тылзе еда райрӱдо гыч акушер-гинеколог, педиатр, терапевт да моло специалист-влакат толыт.
— Медпунктна ончыч илыме пӧртын ик пачерыштыже лийын. Тушто условий изиш начаррак лийын, а у оралтыште оборудованийжат у, — ойла верысе калык. — Адакшым вержат моткоч йӧнын.
Юлия изиж годым кевытыште ужалшылан ышташ шонен. Но медицине корным ойырен налаш ача-аваже темленыт улмаш.
— Авам самырыкше годым медпашаеҥ лияш шонен, но шонымашкыже шуын кертын огыл – банк пашаеҥ лийын. Сандене ачам ден авам мыйым медицине колледжыш тунемаш колтеныт. Студент радамыш логалмеке, икымше ий нелырак чучын ,а кызыт тидын шотышто нимынярат ом чамане, ом ӧкынӧ. Пашам келша, тудым йӧратем, вет илышыште ыштыме поро паша нигунамат огеш мондалт, — ойла Ю.Смелова.
Пытартыш жапыште кугыжаныш могырым самырык специалист-влаклан окса полыш ойыралтеш. Но тыгайым налаш Юлия эше документым поген шуктен огыл. Тугеже тудын эше чыла –ончылно. Паша корнет волгыдо, лектышан лийже, самырык специалист!
А.Байкова.
М.Скобелевын фотожо.
