Хант-Манси автономный округысо Белоярск районысо Казым ден Полноват школлаште «Самырык фотокорреспондентын школжо» семинар эртен. Тудо «Ханты Ясанг» газетын 60 ияш да «Ленин пант хуват» («Ленин корно дене») газетын икымше редакторжо Г.Лазаревын 100 ияш лӱмгечыштлан пӧлеклалтын.
Семинарыш «Марий Эл» газетнан ответственный секретарьжын алмаштышыже Денис Речкинат миен. Тудо редакцийнан пашаж дене, тыгак республикыштына лектын шогышо изданийла денат палдарен. Поснак Денис Иванович газетын илышыштыже фотогарфийын вержылан кугу тӱткышым ойырен. Тудын мутшо почеш, фото – газетын чурийже. Садлан тудо чапле да «илыше» лийшаш.
Семинарыште тунемше-влак заметкым, репортажым руш да хант йылмыла дене иканаште возаш тунемыныт. Практике занятийыште кажне ӱдыр-рвезе шке пашажым йӱкын лудын. Ятыр заметке мемнан коллегыланна пӧлеклалтын.
А пӱчым ончышо-влакын кечыштышт самырык фотокореспондент-влак Денис Речкинын полшымыж дене оҥай фото-влакым ыштеныт. А варажым тудо йоча-влакым «Photoshop» программыште фото дене пашам ышташ туныктен. Мастер-класс деч вара икшыве-влак шкештак фотом «пӱчкын», ретушироватлен, экшыкым тӧрлен кертыныт.
Л.ШАБДАРОВА.
Снимкыште: «Марий Эл» газетын фотокорреспондентше Д.Речкин йоча-влакым фотом войзаш туныкта.
