УВЕР ЙОГЫН

Евстифеев тулык да ача-ава полыш деч посна кодшо икшыве-влак деке миен

1 июньышто, Йочам аралыме тӱнямбал кечын, Марий Эл вуйлатыше Александр Евстифеев тулык да ача-ава полыш деч посна кодшо икшыве-влаклан Лӱльпанысе рӱдерыш миен. 

— Икымше июньышто палемдыме пайрем Йочам аралыме тӱнямбал кече маналтеш. Но мый тудым икшыве-влаклан полыш кече манам ыле. Ме – кугыеҥ-влак, кучем представитель-шамыч — тачысе кечылан мыняр кертына, тунар полшаш тыршена. Тулык икшыве-влаклан кажне ийын илыме верым пуэна, тендан профессионал образованийым налме пашадат удан огыл кая, — саламлымыж годым палемден Александр Евстифеев.

Йоча-влак деке регион вуйлатыше яра кидын миен огыл. Нунылан тудо кугу тортым, канцеляр сатум, ушым пойдараш полшышо модыш-влакым да ӱдыр-рвезе-шамычлан кӱлшӧ эше шуко пӧлекым намиен.

Икымше июнь кеҥеж тӱҥалтыш гынат, игече сылне пагытлан келшыше лийын огыл. Но, тидым ончыде, йоча-влакын ямдылыме пайремышт веселан да шокшын эртен. Тӱрлӧ ийготан ӱдыр-рвезе-шамыч мурым муреныт, куштеныт, почеламутым лудыныт. А эн чолга-влак республик вуйлатыше дене эсогыл модын да пырля фотографироватлалт  шуктеныт.

Лӱльпанысе рӱдерыш Александр Евстифеев икымше гана огыл миен. Кодшо ийын кеҥежым тушто республикысе йочапӧрт-влакын пашаштлан пӧлеклалтше совещаний эртен. А у ий деч ончыч ты социальный учрежденийлан йоча-влакым шупшыкташ автобусым пӧлекленыт.

Л.Камалетдинова.   

Опубликовать в Одноклассники

Добавить комментарий