Шернур район Кукнур школышто шахмат кружок 1996 ий гычак ышта. Тудым Сергей Конаков вуйлата. Сергей Никандрович ты кружокым эше 1985 ийыште Купсола школышто туныктымыж годымак почын. Вара, Кукнур школыш толмеке, пашажым умбаке шуен. Тудо шкеже ятыр ий школ директор лийын, кызыт информатике ден математикым туныкта.
Шахмат дене ушым пойдараш 11 еҥ коштеш. Школын командыже «Белая ладья» районысо таҥасымаште ӱмаште декабрьыште, изирак класслаште тунемше-шамыч тений февральыште, кугурак класслаште тунемше-влак мартыште район кӱкшытан таҥасымашлаште икымше верым налыныт. Сергей Конаков шкежат ешартыш образовательный программе-влакын республикысе конкурсыштышт I степенян лауреатын дипломжо дене ӱмаште палемдалтын.
— Кружокышко коштшо-шамыч коклаште Влад Еманаевым (11-ше класс), Юля Ширшовам (9-ше класс), Никита Еманаевым (7-ше класс), Таня Ямбаршевам (6-шо класс), Ксюша Четкаревам (1-ше класс), Дима Четкаревым (3-шо класс) палемдынем. Нуно кажне гаяк соревнованийыште сеҥышыш лектыт але призер коклаште улыт, — мане туныктышо.
Л.ШАБДАРОВА.
Авторын фотожо.
Снимкыште: Д.Четкарев, Т Ямбаршева, А Пегашев туныктышышт дене иктӧр модаш тыршат.
