ОБРАЗОВАНИЙ

Уста тунемшым куштышо школ

Татарстанысе Агрыз район Кӧлегеш школышто икмыняр пайремым иканаште палемденыт: Шочмо йылмын тӱнямбал кечыжым, Марий калыкын I погынжын 100 ияш лӱмгечыжым, Агрыз районысо образований системылан  90 ий теммым.

Линейкыште тунемше-шамыч шочмо кундемышт, йылмышт нерген почеламутым каласкаленыт, «Туган як» мурым кум йылме дене муреныт, марла кушталтеныт.

Школышто ты кум пайремлан пӧлеклалтше тематике сынан урок-влак эртеныт. Марий йылме, руш йылме, математике урокла «Йылме культур – икте-весе дене мутланымын культуржо» теме почеш эртен. Поснак ешартыш образований дене занятий-шамыч оҥай лийыныт. Йоча-влак тӱрлӧ кидпашам ыштеныт: тӱрленыт, пу гыч пӱчкеденыт. «Фантазий»  фольклор кружокыш коштшо-шамыч устан муралтеныт. Ече дене коштшо ӱдыр-рвезе-влак «Марий ечыгорно-2017» таҥасымашлан кузе ямдылалтмыштым ончыктеныт.

Кӧлегеш школ ик кечылан военно-спортивный модмашын рӱдышкыжӧ савырнен. «Зарница» модмаште ныл команде вийжым терген. «Санитар», «Мый патриот улам», «Лӱйкалымаш», «АК-74 автоматым погымо-рончымо» йыжыҥ-влак йоча-шамычын кумылыштым нӧлталыныт. Кастене ялыште илыше ден уна-влакым весела концерт программе вучен.

Л.МИХАЙЛОВА.

Л.ШАБДАРОВА.

Снимкыште: Кӧлегеш школ уна-влакым порын вашлийын. 

Л.Михайлован фотожо.

Опубликовать в Одноклассники