Параньга поселкысо строительно-технологический техникумышто «Юл кундемысе калык-влакын кухньышт» кокымшо республиканский фестиваль эртен.
Тений тудо марий калыкын кочкышыжлан пӧлекталтын ыле. Участник-влак радамыш ты техникум, Матародо, Лажмарий, Кугу Пумарий, Усола тӱвыра пӧрт-влак, «Централизоватлыме клуб системе» МБУК, аграрно-строительный техникум, торгово-технологический колледж, И.Глушков лӱмеш Оршанкысе колледж, Параньга да Матародо школ-влак ушненыт. Уна-влак коклаште район администраций вуйлатыше А. Ибраев, районысо погынымаш вуйлатыше Л.Михеева да молат лийыныт. Участник-влак марий кухньын тӱрлӧ чесыжым ямдылен конденыт, нунын дене палдареныт, художественный мастарлыкыштым ончыктеныт.
Ӱстембалне шыл, шере, пӧчыж, йошкарушмен когыльым, ӱячам, кӱктыо нужголым, салмамуным, шӱраш дене фаршироватлыме чывыигым да моло тамле кочкышымат ужаш, да тамлаш йӧн лийын. Презентаций тӱҥалме деч ончыч марий национальный вургем, ыштыш-кучыш, арвер, книга дене палдарыше ончер эртен. Пайремым творческий коллектив-влакын выступленийышт сӧрастарен.
Сеҥыше-влакым посна номинаций дене палемденыт. Мутлан, «Эн сайын презентоватлыме ӱстел» номинацийыште Кугу Пумарий тӱвыра пӧрт, «Эн сай кулинар блюдо» номинацийыште Параньга строительно-технологический техникум ден Усола тӱвыра пӧрт, «Эн сай кондитерский изделий» номинацийыште транспортно-энергетический техникум да торгово- технологический колледж ойыртемалтыныт.
С.Носова.
