30 майыште Марий Эл мучко тале тӱтан мардеж эртымылан кӧра шуко туткар лийын.
МЧС специалист-влакын увертарымышт почеш, мардеж секундышто 25 метр писылык дене пуэн. Тудо республикын ятыр районжым авалтен. Пушеҥгым йӧрыктылын, ятыр оралтым, леведышыштым налын каен. Эсогыл сад-пакчалаште теплицымат налын кудалтыме сӱрет вашлиялтын. МЧС специалист-влакын увертарымышт почеш, 200 квадрат метр утларак кумдык наре локтылалтын.
Йошкар-Олаште гына тӱтан мардеж 20 утла наре пушенгым йӧрыктен. Мемнан редакцийын пашаеҥжат пушеҥге йӧралтме верыш изиш логалын огыл. А вес ӱдырамашым тыгай туткар поктен шуын, медицине полышым пуэныт, но эмлалташ возаш тореш лийын.
Электровоштырат ятыр районышто кӱрышталтын. Тӱтан мардежын кондымо туткарым кораҥдымашке энергетик, комунальный службын пашаеҥже-влакым ушымо.
С.Носова.