УВЕР ЙОГЫН

Индий Йошкар-Олаште у кампусым чоҥаш шийвундым ойырышаш

Марий Эл Республик вуйлатыше Александр Евстифеев йот эл гыч инвестор дене вашмутланымашым эртарен. 

Европо кӱкшытан кампусым ышташ Марий Элыш Индий кок миллиард  наре теҥгем кучылташ шона. Тидын нерген Марий Эл вуйлатыше Александр Евстифеевын RUS EDUCATION-ын директоржо СайедКумруЗаман дене вашмутланымашышт годым пале лийын.

Кызыт Марий кугыжаныш университетыште Индий гыч 700 утла студент тунемеш. СайедКумруЗаманын Александр Евстифеевлан каласкалымыж почеш, ончыкыжым студент-влакын олаштышт йот элла гыч 6 тӱжем студент илен кертеш. Тиде кызытсе жапын чыла йодмашыжлан келшен толшо Европысо кӱкшытан кампус лиеш. Йот эл гыч инвестор проектын икымше йыжыҥжым илышыш тенияк пурташ тӱҥалаш да идалыкат пеле жапыште тудым мучашлаш кумылан улмыж нерген каласен. А чоҥымо пашам вич ий жапыште тӱрыс шуктышаш нерген ойлен.

Марий Эл Республик вуйлатышын полномочный представительже – Марий Эл Республикын министрже Николай Коротковын мутшо почеш, тиде проект кызыт шымлалтеш.

Александр Евстифеев тыгак МИД дене пашам ышташ кӱштен. Тиде шотышто мутланымаш деке тудо июньышто пӧртылаш темлен.

— Лишыл кечылаште темлымашдам, йодмашдам кондаш йодам. Университетат тек тышке ушна. Кызытеш документ-влакым шымлаш тӱҥалына, — каласен республик вуйлатыше.

Л.Камалетдинова.

Опубликовать в Одноклассники

Добавить комментарий