Йошкар-Оласе Вашкеполыш станцийыште «Фельдшер – шӧртньӧ кид» конкурс колымшо гана эртен. Тений тушто вич самырык специалист – Валерий Евсеев, Наталья Егошина, Денис Речкин, Анастасия Сафаргалиева да Виктория Трифонова – профессиональный мастарлыкыштым тергеныт.
Госпиталь йыжыҥыште полышым пуымо йодышлан вашештыме, шӱм-шодо реанимацийым, проста медицине манипуляцийым шуктымо техникым, повязкым пыштыме радамым ончыктымо деч посна конкурсант-влак эше визитный картычкышт дене выступатленыт, «Таза илыш йӱла» теме дене ямдылыме буклетыштым араленыт, артист да кулинар мастарлыкышт дене палдареныт.
Участник-влак теоретический да практический профессиональный заданий-шамычым тӱрыснек шуктеныт, ончаш толшо калыкым художественный самодеятельностьышт да путырак тутло кочкышышт дене куандареныт.
Конкурсын чыла йыжыҥжым иктешлыме почеш, икымше верым Виктория Трифоновалан пуымо, кокымшым – Анастасия Сафаргалиевалан, кумшым – Валерий Евсеевлан. Ончышо-влакын призыштым Наталья Егошиналан кучыктымо.
Тӱҥ фельдшер Ольга Сироткован вуйлатымыж почеш организатор-влак конкурсант-шамычлан чапле наградым ямдыленыт. Микроволновый коҥга, утюг да блендер гай тӱҥ приз деч посна кажне участник Медицине пашаеҥ-влакын ассоциацийышт деч пледым, быт химий, косметике набор-влакым, чайым, тонометрым налын.
М.ИВАНОВА.
