Кугыжаныш Думын образований да науко шотышто комитетшын членже Светлана Солнцева ден национальность-влак паша шотышто комитетын председательже Ильдар Гильмутдинов эсогыл заседаний-влак коклаште каналтыме жапыште Марий Элыште тений эртараш палемдыме межрегиональный мероприятий-влак нерген мутланеныт.
Ильдар Гильмутдиновлан «Йыван Кырла лудмаш: национальная культура в социальном пространстве и времени» V межрегиональный научно-практический конференций лийшаш нерген увер ойыртемалтшын чучын. Тудо Марий калыкын I-ше съездшылан 100 ий темме вашеш эртаралтеш.
«Кажне ийын эртаралтше да поро йӱлашке савырныше конференций Марий киноактер да поэт Йыван Кырла лӱмеш лиеш. Черетан конференцийыште региональный да национально-культурный политике дене кылдалтше проблемым, национальный культурым вияҥдымаште этнический йӱла, йылмын рольжо да культурно-познавательный туризм дене кылдалтше йодыш-влакым каҥашаш тӱҥалыт. Кызытсе жаплан келшыше информационный средам да Марий Эл Республикыште творческий индустрийым вияҥдыме нерген мутланымашат ӧрдыжеш огыт код», — палдарен Светлана Солнцева.
Мероприятийын кӱлешлыкшым палемден, комитет председатель конференцийын организаторжо-влаклан тауштен ойлен.
Л.Камалетдинова.
