Российысе госпиталь-влакым иктешлыме почеш, Сарын ветеранже-влакын республикысе клинический госпитальышт «За внедрение «золотого» стандарта диагностики остеопороза» номинацийыште сеҥышыш лектын да диплом, «Российын сарын ветеранже-влакын сай госпитальышт» кубок дене палемдалтын.
– Остеопороз диагностикын «шӧртньӧ» стандартшылан рентген денситометрий шотлалтеш, – каласкала госпитальын врач-гериатрже, остеопорозым эмлыме шотышто специалист Оксана Овчинникова. – Тиде аппарат дене ме ынде идалык утла пашам ыштена. Тудо лун минеральный чоткыдылыкшым виса. Российысе ятыр регионышто ультрайӱкан денситометр дене пайдаланат, но тудо лун чоткыдылыкшым пеш рашыжак ок ончыкто. Элыштына рентген денситометр шукыжак огыл, а мемнан госпитальысе гай лун тӱжвал структуржым веле огыл, тыгак кӧргыжымат ончыктышо аппарат – икмыняре гына.
Остеопорозым XXI курымын йӱкдымӧ эпидемийжылан шотлат, вет шуко пациент тазалыкыштыже нимогай уто-ситым ок шиж, молан манаш гын лу массын 20-30 процентше йоммешке чер шкеж нерген нигузе ок палдаре. Врачын приёмышкыжо тӱҥ шотышто черын неле йыжыҥыштыже, лум пудыртымек гына толеш.
Лум пеҥгыдемдыше кальций ден фосфор айдемын 25-30 ияшыже марте ешаралтын толыт, а вара катыкемаш тӱҥалыт. Остеопороз годым лу тканьысе минеральный вещества-влак утыжденат мушкылт лектыт, лу губко гай рожлан лиеш.
Таче айдемын ик эн тӱҥ задачыже – врач дечын черын профилактикыже шотышто консультацийым налаш, остеопорозым жапыштыже диагностироватлаш, тупрӱдым, эрде шейкым монь пудыртымо деч шекланен, чолган да чын эмлалташ.
Черын вияҥмыжым лулегын утыждене «рожлан» улмыжат палдара. Мутлан, айдеме идалыкыште 2 см дечат шукылан лапкаҥеш. Но раш сӱретым рентген денситометрий процедурышто веле ужаш лиеш. Тиде йӧн дене шымлымек, врач пациентлан чын диагнозым шынден да эмлалтме йӧным палемден кертеш. Сандене специалист деке мыняр ондак миет, тунар сай.
М.ИВАНОВА.
