«МАРИЙ ЭЛ» ТАЧЕ

«Марий Эл»: Лудшо-влак деке лишкырак

Кодшо арнян У Торъялысе межпоселенческий рӱдӧ книгагудышто «Марий Эл» газет редакций пашаеҥ-влак районысо библиотекарь-шамыч дене вашлиймашым эртареныт. 

Вашлиймашын тӱҥ шонымашыже – «Марий Эл» газет нерген палдараш, шочмо марий йылмым самырык тукым коклаште шараш, тудым арален кодаш, марла лекше газет ден журналым лудаш, нунын ӱшанле таҥже лияш кумылаҥдаш. Тиде пашашке библиотекарь-влакым ушаш.

Журналист Любовь Камалетдинова ден фотокорреспондент Михаил Скобелев «Марий Эл» газет нерген радамын каласкалышт, викториным эртарышт. Йодышлан раш вашмутым пуышылан календарьым да книга пӧлекым кучыктышт.

Пытартыш жапыште илышын вашталтмыже, у технологийын моткоч писын вияҥмыже чыла вере шижалтеш. Компьютер, сото телефонлан кӧра книга лудшат шагалемын. Икте ӧрыктарыш: ял ден селаласе книгагудылаште газетлан подпискым шагал ыштат. Тидыжым чылан палемдышт. Марла газет ден журналым южо библиотекыште йӧршеш огыт нал.

– Мый шканем «Марий Эл», «Кугарня», «Сельская новь» газетым  налам. Мӧҥгӧ гыч книгагудыш лудаш наҥгаем. Марий ялыште илена, марла кутырена, сандене шочмо йылме дене книгам йодыт. Марла возымо у книга шагал. Южгунам лудшо-влакымат полшаш йодына. Мутлан, ӱдырамаш клубыш коштшо-влак витле теҥге дене поген пуэныт, – тургыжланен ойла Кӱан памаш ял гыч библиотекарь Маргарита Маркова.

Вашлиймаш деч вара районысо книгагудылаште пашам ыштыше-влак марла газетлан подпискым ышташ, тудым лудаш калыкым кумылаҥдаш тыршаш тӱҥалыт манын сӧрышт.

Тыге библиотекарь-влакат марий изданийым арален кодаш, тиражшым кугемдаш, шочмо йылме дене лудаш калыкым, самырык тукымым кумылаҥдымаште ӧрдыжеш огыт код шонем.

Е.Эшкинина.

Опубликовать в Одноклассники

Добавить комментарий