Йошкар-Ола воктенсе 20 наре мланде кумдыкын «пӱрымашыже» шыже марте рашемдалтшаш — кӱштен Марий Эл вуйлатыше Александр Евстифеев республикын кугыжаныш пого министржылан. Тиде йодышым Правительстве пӧртыштӧ регионышто коррупций ваштареш кучедалме шотышто пашам виктарыме комиссийын эртыше заседанийыштыже каҥашыме, палдара Марий Эл вуйлатышын организаций-аналитике виктемже.
— Нине участкым ужалымашке лукман але пайдаланаш тореш улмо нерген пунчал лекшаш. Мадридысе двор гай нимогай тайне лийшаш огыл, — каласен Александр Евстифеев.
Тыгак заседанийыште республикысе кугыжаныш да верысе самоуправлений органлаште служебный поведений шотышто йодмашым шуктымо да интерес шумлык конфликтым тӧрлымӧ шотышто, интерес шумлык конфликт лектын кертме лӱдыкшым кораҥдыме але тыгай конфликт шумлык йодмашым должностной еҥ-влакын шуктыдымыштым рашемдыме шотышто комиссий-влакын пырля пашам ыштымыштым саемдыме темым каҥашеныт.
Кок йодыш шотыштат пунчалым луктыныт. Исполнительный кучем ден ола округ да муниципал район-влакын администраций вуйлатышыштын интересышт шотышто келшыдымаш случай лиймым пален налме дене кылдалтше паша почылтшын да эреак эртаралтеш манын палемденыт.
— Марий Эл вуйлатышын коррупций да моло шотышто правам пудыртымашым шижтарыме шотышто управленийлан кугыжаныш гражданский, муниципал служащий-влакын тӱлыман вес пашам ыштымышт да Марий Эл Республикын исполнительный кучем орган-влак ден верысе самоуправлений орган-влакын моло пашаеҥыштын совместительстве йӧн пашам ыштымышт шотышто анализым эртарыме нерген сведенийым пуымо формым ямдылыман. Тиде проектым депутат ден администраций вуйлатыше-влаклан каҥашаш колтыман.
Тыгак нине йодышым каҥашаш кажне ийын семинарым, «йыргешке ӱстелым», конференцийым эртарыман, тушко правам аралыше орган, прокуратур пашаеҥ-влакым ӱжман манын палемденыт.
Л.Камалетдинова.
