Россий МЧС-ын Марий Элысе Тӱҥ управленийжын паша опытшым округ кӱкшытыштӧ сайлан шотленыт.
Тидын нерген Марий Элыште эртыше тергымаш деч вара Россий МЧС-н Рӱдӧ региональный рӱдержын вуйлатышыжын пашажым жаплан шуктышо элкӧргӧ службын генерал-майоржо Валерий Синьков Марий Эл вуйлатыше Александр Евстифеев дене вашлиймыж годым увертарен.
Тергымаш 14-18 май гутлаште эртен. Комиссий член-влак «112» системын пашаже, «Лӱдкышыдымылык ола» программын илышыш кузе шыҥдаралтмыж дене палыме лийыныт. Тыгак личный составын професиональный ямдылалтмыжым тергыме амал дене занятий-влакым, пожар дене кылдалтше условный чрезвычайный ситуацийым кораҥдыме шот дене командно-штабной тренировкым эртареныт.
Тидын дене пырля вашлиймаш годым чрезвычайный ситуацийым шижтарыме да кораҥдыме шотышто Россий МЧС-ын территориальный органже да Марий Эл Правительстве коклаште вашкылже нерген мутланеныт. Ты шотышто Александр Евстифеев палемден: тылзе ончыч регионын пожар ваштареш кучедалме куатшым пеҥгыдемдаш шонымаш дене республикын правительствыжын резерв фондшо гыч 1,5 милион теҥге пожарный техникым уэмдаш ойыралтын. Александр Евстифеев Россий МЧС-ын Рӱдӧ региональный управлений вуйлатышыжым республикыш толын коштмыжлан да ведомствын задачыже-влакым решатлен толмаште полшымыжлан тауштен.
С.Носова.
