Юл кундем кугыжаныш технологий университетын Чернушко лесничествыш пурышо тунемме-опытный участкыштыже у чодырам шынденыт.
Пушеҥге озымым Татарстан Республикысе Сабинский лесхоз гыч конденыт, да тыглайым огыл, а саемдыме урлыкым. Ик кечын гына 20 тӱжем наре пӱнчӧ озым шындалтын.
Тиде пашам «Юлтехын» студентше, туныктышыжо, тыгак чодыра отрасльын специалистше, ветеранже, кугыжаныш кучемын еҥже-влак шуктеныт. Нунын деке Марий Эл вуйлатыше Александр Евстифееват ушнен. Озымым шындыме коклаштак регион вуйлатыше чодыра отрасльын ветеранже-влак дене палыме лийын. Мутлан, Кугу Отечественный сарын участницыже Тамара Михайловна Саяпина 92 ийыш тошкалын. Лач сар годымак вашлийме пелашыж дене коктын ӱмыр мучкышт чодыра пашаште тыршеныт. Кызытат тудо шке паша опытшым самырык-влаклан пуа. Александр Евстифеев тудлан тауштен да кужу ӱмырым тыланен.
Чодырам шындыме акций кышкарыште Александр Евстифеев «Юлтехын» тунемме-опытный участкыштыже кучылталтше техникым ончен лектын. Ректор Евгений Шебашев, вузын президентше Евгений Романов, пӱртӱс поянлык, экологий да йырым-йырысе средам аралыме министр Владимир Шутов дене пырля республикыште чодырам уэмден толмо паша нерген каҥашеныт.
Чодырам шындыме акцийыш Пӱртӱсым аралыме марий межрайонный покуратур, Росреестрын, ФСИНын управленийже-влакын еҥышт ушненыт. Регион вуйлатыше пӱртӱс поянлыкнам арален да тӱзатен толмаште тыршыше-влаклан чылаштлан тауштен.
Палемден кодыман, тений республикыште 1370 гектар кумдыкышто у чодырам шындаш палемдыме. Марий Эл Республикым вуйлатышын организаций-аналитике виктемжын увертарымыж почеш, кызытеш ты пашам 1216 гектарыште шуктымо.
С.Носова.
