УВЕР ЙОГЫН

Приамурьыште Марий Элысе пожарный десантникым кычалыт

Приамурьен Зейский районыштыжо, Снежногорск посёлко денрак, чодыра пожарым йӧртымӧ годым 9 май кастене Марий Эл гыч  мийыше пожарный десантник йомын. 

«Авиалесоохрана» ФБУ-н Марий Эл гыч кайыше 100 еҥан отрядше тушко 27 апрельыште миен улмаш. Марий пожарный-влак дене пырля туштак Забайкальен, Бурятийын, Омск, Красноярский край гыч мийыше отряд-влак тулым йӧртымаште тыршеныт.

Но 17 майланат мемнан пожарныйым муын огытыл. Кеч тудым кычалме пашаш 80 еҥым ушеныт. Тиде — сонарзе-влак кокла гыч чумырымо волонтер, Белогорск ола гыч кычалше-утарыше-шамыч, Амур авиабазын да «Авиалесоохрана» федеральный резерв ФБУ-н, полицийын пашаеҥже-влак улыт. Кӱшыч вертолёт да самолёт полшымо денат кычалыт.

Йомшо пожарник — кугу опытан спецалист. Куд ий наре чодыра пожарым Забайкальский крайыште, Ямал-Ненец автоном округышто, Амур, Ростов, Волгорад, Иркутск областьлаште йӧртен. Чодыраште пашам ыштыме да верыште ориентироватлалт моштымо опытшат ситышын, сандене тудо илыше манын шонат да кычалме пашам шуят.

С.Носова.

Опубликовать в Одноклассники

Добавить комментарий