Чылажымат радам дене да жапыштыже тӱҥалаш тений чаракшат изи огыл ыле: йӱрлан да юалге игечылан кӧра ӱдышашлык мланде путырак вӱдыжгӧ лийын. Тыге 16 майлан тӱшка ялозанлык предприятий ден кресаньык (фермер) озанлыклаште икияшым 46,7 тӱжем чоло гектарыште ӱдымӧ. А план почеш 144 тӱжем гектар лийшаш. Пареҥгым да пакчасаскам шындыме шотышто ойлаш гын, нунымат кызытеш шагал вераҥдыме: икымшыжым 0,3 тӱжем гектарыште гын, пакчасаскам – 0,1 тӱжем утла гектарыште гына.
Шошо ага паша эн сайын Медведево ден У Торъял районлаште ворана. Палемдыме кундемлаште икияшым 51-57 процентшым ӱдымӧ.
Озанлыклаште кокияш озымым да шукияш кушкылым ончен куштымо паша умбакыже шуйна: икымшыжым 12,9 тӱжем гектарыште тырмалыме, шукияш кушкылым – 57,3 тӱжем гектарыште. Минерал ӱяҥдышым шавыме шотыштат паша шке радамже дене кая. Тыге кокияш культурлан тидым 19,5 тӱжем гектарыште ыштыме гын, шукияш кушкыллан – 6,1 тӱжем гектарыште.
Пасу паша сайын да жапыштыже вораныже манын, тӱшка озанлыклаште технике уэмдалтеш. Тений 14 майлан 131 миллион теҥгелан чылаже 119 единице ялозанлык технике ден оборудованийым налме. Тышеч 25 трактор, мландым пушкыдемдыме да ӱдымӧ 16 агрегат. Чумыр гыч 11 техникыжым (12,4 миллион теҥгелан) «Росагролизинг» АО гоч федеральный лизинг йӧн дене налме. Тений Российыште ыштен лукмо ялозанлык техникым 15 процент скидке дене налаш йӧн уло: 14 май жаплан тидлан 37 миллион теҥгеаш 15 ойпидышым ыштыме.
Г.Кожевникова.
