УВЕР ЙОГЫН

Волжскышто бокс дене турнир эртен

3-6 майыште Волжскышто бокс дене Российын чемпионжо, СССР-ын спорт мастерже Олег Наумовын призше верч «Б» классан турнир эртен. Таҥасымаш тыгак Кугу Отечественный сарлан 73 ий темме лӱмеш пӧлеклалтын. 

Тушто элнан 12 субъектше гыч шӱдӧ наре спортсмен вийжым терген. Юлсер кундемыш Киров, Самара, Магадан, Нижегородский областьла, Татарстан, Марий Эл, Чуваш, Удмурт, Пошкырт, Таджикистан республикла, Санкт-Петербург ола гыч толшо участник-шамыч рингыште сай бойым ончыкташ тыршеныт, патыр улмыштым ончыктеныт.

Марий Эл гыч 13-14 ияш-влак коклаште А.Вахаев «Турнирын эн сай боксёржо» кубок дене палемдалтын, 17-18 ияш-влак коклаште (52 кг, бокс дене тӱнямбал чемпион В.К.Львов лӱмеш клубын воспитанникше) Р.Кайсинлан медальым, дипломым, шергакан пӧлекым кучыктеныт.

Е.Эшкинина.

Опубликовать в Одноклассники

Добавить комментарий