УВЕР ЙОГЫН

Жаплан келшышын: Военный службо да Марий Эл ушеныт

4 майыште Москваште, Россий МЧС-ын тул ваштареш кучедалме службо академийыштыже, марий кундемыште шочын-кушшо генерал-влак дене вашлиймаш лийын. Тидлан амалым нунылан «Защитники России – генералы земли марийской» книга ыштен. кучыктымо амал дене эртен. Книга-альбомын авторжо А.Курочкин шкежак миен.  Вашлиймаште тыгак Марий Эл гыч тиде вузышто тунемше-влак лийыныт.

– Жапше шыгыр гынат, землякна, элкӧргӧ службын генерал-полковникше Иван Михайлович Тетерин тыгай вашлиймашым организоватлаш полшен. Тау тудлан. Толшо генерал-влакын илыш-корнышт нерген келгынрак пален налынна. Шукышт Афган, Чечня сарым эртеныт. Чылаже кандаш генерал, да тыгак ныл генералын икшывышт миеныт. Кажныштлан книгам пӧлекленна. Чаманен каласыман, икмынярышт паша дене ӧрдыж кундемлаште лийыныт, толын кертын огытыл. Вашлиймаш поро шӱлыш дене эртен. Тыгай мероприятий  чын историйым палемден кодаш полша, – ойла А.Курочкин. – Чылаштым военный службо да Марий Эл ушен. Мыланем гын тиде вашлиймаш эше Сеҥымаш кече деч ончыч эртымыж дене шерге. Вет мыйынат ачам Кугу Отечественный сарын участникше. 1940 ий гыч 1945 ий июль марте кредалын. Тудо мыланна чыла шотыштат пример лийын.

Аркадий Максимович Москошко Марий Эл нерген ямдылыме тӱрлӧ видеороликым намиен. Тыге генерал-шамыч вер-шӧрышкына экскурсий дене «миен савырненыт», республикын, вашталтмыжым ончен куаненыт. Тӱрлӧ амаллан кӧра шукышт ятыр ий Марий Элыште лийын огытыл. Вашлиймаш Россий МЧС академийыште тунемше Килемар, Кужэҥер районла, Волжск ола, Медведево посёлко гыч ӱдыр-рвезе-влаклан шуко жаплан кугу шарнымашым коден. Тыге нуно земляк-патриот-влакым палаш тӱҥалыт, икте-весе дене кылым ыштат.

А.Курочкин моткоч кугу, суапле пашам ыштен. Ты вашлиймаш военный службо дене кылдалтше-влакын икте-весыштым эше сайынрак пален налмышт  дене шерге. Нуно ончыкшымат кылым кучаш тӱҥалыт.

Адакшым мероприятий деч вара книгам уэмден, эшеат келгемдаш йӧн лиеш. Ончыкыжым генерал радамыш кундемна гыч у тукым ушна манын ӱшанена.

Е.Эшкинина.

Опубликовать в Одноклассники

Добавить комментарий