Оксам ыштен налаш да шолышташ еҥ-влак мом-гына шонен огыт му?!
Кодшо кечылаште Йошкар-Олаште илыше 19 ияш студенткылан ик социальный кылыште йолташ ӱдыржӧ деч увер толын. Тушто тудо банк картышкыже 3,5 тӱжем утла теҥгем колташ йодын возен. Нимо удам шоналтыде, студентке йодмо семын ыштен. Но икмыняр жап гыч пале лийын: йолташ ӱдыржӧ чыла тидын нерген огешат пале. Амалже: тудын страницыжым пудыртен пуреныт улмаш.
Кызыт тиде факт шотышто тергымаш кая, палда Марий ЭЛ МВД-н пресс-службыжо.
Полиций пашаеҥ-влак оксам колташ але иктаж-могай вес полышым пуаш йодмо годым тидым вигак шукташ тӱҥалме деч ончыч теве мом ышташ темлат:
— тыгай сынан увер толмеке, кӧн колтымыжым рашемдыман да тудо тидым чынже денак возен але уке – йодман. Колтен огыл гын, йодмо гыч нимомат шуктыман огыл;
— «йолташ-влак» радамыш палыдыме еҥым ушаш тыршыман огыл;
— шке страницыш але сайтыш пураш куштылго парольым шындыман огыл.
Л.Камалетдинова.
