Марий Элыште 2017 ийысе эн сай россий еш нерген фильмым сниматлат.
Марий Эл Республикын Социальный вияҥмаш министерствышкыже Йоча да юношестве экранный усталык форумын президентше, Россий искусствын сулло деятельже, кинорежиссёр Владимир Грамматиков лектын да «ЗУМ» йоча киностудийлан «2017 ийын ешыже» всероссийский конкурсышто сеҥыше Шабдаровмыт еш (Шернур район) нерген конкурслык фильмым сниматлаш полшаш йодын. Тудым «Бумеранг» йоча да юношестве экранный усталык всероссийский форумын финалыштыже ончыкташ палемдыме.
Регионын Социальный вияҥмаш министерствыже Тӱвыра, печать да калык-влакын пашашт шотышто министерстве дене пырля «ЗУМ» йоча киностудийлан Шернур районысо Купсола ялыште съёмкым эртараш йӧным ыштен. «Фильмын икымше ужашыжым войзымо годым Купсолаште «Путёвка в жизнь» икымше йӱкан фильмыште модшо кумдан палыме актёр Йыван Кырлан шочын-кушмыжым да Шабдаровмытын родыжо лиймым пален налмеке, ме ӧрын-куанен колтышна. Шабдаровмыт еш кечываллан моткоч тутлын пукшышт. Эн чотшо шке мӱкш отарысе тамле деч тамле мӱйышт келшыш. Тиде еш уста, пашаче улмыжо, икте-весе дене келшен илымыже, шокшын вашлиймыж дене ӧрыктарыш», – палемденыт «ЗУМ» йоча киностудийын участникше, фильмын авторжо-влак.
Сюжет почеш Шабдаровмыт ешым эше Йошкар-Оласе Патриарший площадьыште сниматлаш палемдыме.
Тылеч посна Социальный вияҥмаш министерстве съёмкым ыштыше бригадылан фильмым монтироватлаш йӧнан верым ойырен.
Ушештарена, Шернур районышто илыше Шабдаровмыт еш кодшо кеҥежым иканаште кок конкурсышто сеҥышыш лектын: «Успешная семья Приволжья-2017» фестиваль-конкурсышто да «2017 ийын ешыже» всероссийский конкурсын «Шуко шочшан еш» номинацийыштыже.
М.ИВАНОВА.
