Марий Эл правительствыште республикын здравоохраненийжым вияҥдыме нерген мутланеныт.
25 апрельыште Правительстве пӧртыштӧ Марий Элыште илыше калыклан эмым ситарыме, йоча поликлинике-шамычын материально-технический базыштым вияҥдыме, регионышто единый диспетчер службым ыштыме, Козьмодемьянскыште поликлиникым да Йошкар-Олаште вашке полышым пуымо станцийым чоҥен пытарыме йодыш-влакым лончыленыт.
Совещанийым Марий Элым вуйлатыше Александр Евстифеев вӱден. Тушто правительстве председательын алмаштышыже Илга Дравниеце ден тазалыкым аралыме министр Марина Панькова лийыныт.
«Тений Россий президентын резерв фондшо гыч йоча поликлинике-влакын да медицине тӧнеж-шамычын поликлинике отделенийлаштын материально-технический базыштым вияҥдаш 60 миллион наре теҥге ойыралтеш, республикын бюджетше гыч – вич миллион теҥге. Федеральный средства дене поликлинике-влакын технический базыштым пойдараш кутырен келшыме, а республикын оксаж дене поликлинике ден организаций-влакын кумдыкыштым саемдаш палемдыме», – манын Илга Дравниеце.
«Иктешленрак каласаш гын, черетым иземдаш але тудым йӧршын пытараш сай йӧным ышташ», – рашемден А.Евстифеев.
Вашлиймаште регионысо калыклан сай качестван да шергакан препаратым ситарыме йодышымат лончылымо.
«Пытартыш кварталыште шергакан препарат дене эмлалтше пациент регистр 50 еҥлан ешаралтын. Тиде онкологий, ревматоидный артрит, тӱрлӧ шӱм чер дене орланыше-влак улыт. Нине пациентын ик рецептышт кокла шот дене 400 тӱжем теҥгеш шуэш. Тиде цельлан мыланна 21 миллион утла теҥге кӱлеш», – палемден М.Панькова.
Таче Марий Элыште 21173 еҥ сакыр диабет дене орлана. Тиде чот гыч 12000 пациент эмым регионысо льгот дене налеш. Тыге, инсулин ден таблетироватлыме препаратлан идалык мучаш марте 10 миллион утла теҥге кӱлеш.
Марий Элым вуйлатыше А.Евстифеев республикысе эм шапаш нерген йодыштын да кӱлешан препарат-влакым налме шотышто конкурс процедурым эртыме жапым рашемден.
«Августышто налаш палемдыме эм идалык мучаш марте ситышаш. Но октябрьыште, пациент кӱрылтде эмлалтше манын, шушаш ийын январь-февральжылан ситарышаш эмым налме шотышто чолган пашам ыштыман», – палемден А.Евстифеев.
Министр М.Панькован палемдымыж почеш, республик тиде пашам жапыштыже ыштен шукта. Нине граждан-влак ончылно социальный обязательствым шуктышаш чумыр суммо 2018 ийыште 34 миллионат 408 тӱжем теҥгеш шуэш.
Вес йодыш республикыште Вашке полышым пуымо централизоватлыме диспетчер службым почмо дене кылдалтын.
Россий Федерацийыште тыгай организаций кандаш регионышто гына уке. Нунын коклашке Марий Элат пура. Но правительствын да Александр Евстифеевын тыршымышт дене регион Россий президентын резерв фондшо гыч 56 миллион теҥгем налын. Кызыт Единый диспетчер службылан палемдалтше оралтын реконструкцийже кая. Тудо «Медтехника» сервис рӱдерын ончычсо зданийыштыже лиеш.
Тиде проектым илышыш тичмашнек пурташ манын, республикын бюджетше гыч эше кандаш миллион утла теҥгем ойырымо. Окса эн ончычак компьютер техникым, кӱлшӧ мебельым налаш, тыгак кабель системым монтироватлаш кая. Единый диспетчер службо Медицине полышым писын пуымо станций дене пырля ик оралтыште верлана.
Марий Элыште илышыш пурташ палемдыме эше ик проект – Козьмодемьянск оласе поликлинике. Чоҥен шуктымо полатым у оборудований дене шыҥдараш Россий президентын резерв фондшо гыч 54 миллион теҥгем налме. Тиде тӧнежыштак Курыкмарий да Юрино районлаште илыше-влаклан первичный вӱргорно отделенийым почаш палемдыме. Марина Панькован палемдымыж почеш, медицине тӧнежым чоҥен шуктымо пашалан федеральный бюджет гыч эше 96 миллион теҥгем ойырымо. Объектым идалык мучаште сдатлаш палемдыме.
Совещанийште тыгак Йошкар-Оласе медицине колледжын аккредитацийже нерген мутланыме. Тиде пашалан ик миллион утла теҥгем ойырымо.
Марий Эл Республикым вуйлатыше Александр Евстифеевын медицине организацийлаште врач-специалист-влакым ситарыме йодышыжлан вашештышыжла, Марина Панькова ӱшандарен: кодшо ийын регионыштына 14 участковый врач пашам ышташ тӱҥалын. Тыгай практикым республикыште икымше гана кучылтмо.
М.ИВАНОВА ямдылен.
