Апрель мучаште Йошкар-Оласе «Марий Эл» ий полатыште «Шӧртньӧ шайбе» всероссийский турнир иктешлалтын. Верысе «Спартак» команде ший медальын озаже лийын. Оза-влак финал марте икымше гана шуыныт.
Таҥасымаш 2001-2002 ийлаште шочшо рвезе-влак коклаште эртаралтын. Тушто элнан 11 регионжо гыч команде-влак вийыштым тергеныт.
Икмыняр кече талын модмаште Челябинск область гыч «Молот» команде сеҥышыш лектын. Икымше вер верч модмаште уна-шамыч Йошкар-Оласе «Спартак» командым 2:1 счёт дене сеҥеныт. Кумшо верыште – Екатеринбург гыч «Синие Камни» команде.
Е.Эшкинина.