КРИМИНАЛ

Пошкудо кундемыш шолышташ миены

Йошкар-Ола гыч кум еҥ Казаньыште банкомат гыч оксам шолыштыныт.

Тиде тений 10 январь йӱдым лийын. Кум пӧръеҥ Казаньысе Ямашев  проспектыште ик банкоматым пудыртеныт да улшо оксам налын каеныт. Татарстанысе МВД пашаеҥ-влак тидым Йошкар-Ола гыч 24, 27 да 29 ияш еҥ-влакын ыштымыштым рашемденыт. Пошкудо кундем гыч полицейский-влак кумыньыштымат Йошкар-Олаште кодшо кечылаште кученыт. Но иктыже нуным пачерышкыже пурташ тореш лийын. Омсам болгарке дене пӱчкын почаш тӱҥалмыштым колын гына торешланымыжым чарнен.

— Кумыньышт кокла гыч коктынжо преступленийым ыштымылан тидын мартеат судитлыме лийыныт. Эн самырыкше веле эше уголовно мутым кучен огыл, — палемдат Татарстан Республикысе МВД-н пресс-службыштыжо.

Тыге, мутлан, 29 ияш пӧръеҥ смартфонлашке вирусан программым колтен да тудын полшымыж дене абонент счётла гыч оксам шолыштмыжлан четлык коклаште шинчен лектын. Тиде веле огыл, кызытат тыгаяк сынан преступленийым ыштымыжлан тудын шотышто следствий кая.  

Весыже, 27 ияш пӧръеҥ, компьютерлан эҥгекым конден кертше программым ыштымылан, кучылтмылан да шаркалымылан судитлыме лийын. Тидын годым кумытынат официально пашадымылан шотлалтыт.

Полицеский-влак нунын осал пашам ыштымышт деч ончыч иктыжын банкоматын могай улмыжым, пӧлемыште кузе верланымыжым палаш манын, фотографироватлымыжым рашемденыт. Палемдыме кечын 4 шагат эрденак нуно тушко миеныт да электрон устройство полшымо дене оксам шолышт  куржыныт.

Судын решенийже почеш кумыньыштымат арестоватленыт. Кызыт полицейский-влак шолыштмо оксаштым кычалыт да Татарстаныште моло вереат тыгай сынан преступленийыш ушнымыштым тергат.

Л.Камалетдинова.

Опубликовать в Одноклассники