УВЕР ЙОГЫН

Шуко шочшан еш-влакын семинарым эртареныт

21 апрельыште Йошкар-Олаште, Мер-политик рӱдерыште, «Шуко шочшан еш-влакын праваштым аралымаш да Марий Эл Республикыште нунылан пуымо кугыжаныш полыш» семинар эртыш. 

Тушко утларакше рӱдолаште илыше еш-влак чумыргеныт гынат, Медведево, Оршанке, Звенигово районла гычат еш-влак толыныт ыле.

Семинарыште ача-ава-влаклан кучем еҥ-шамыч дене мутланаш йӧным Российысе шуко шочшан еш-влакын мер ушемыштын регион кокласе  союзыштын радамышкыже пурышо «Большая семья» республикысе мер организаций ыштен.

Тиде мероприятий моткочак кӱлешан ыле, молан манаш гын, шуко шочшан еш-влаклан кугыжаныш велым могай полыш пуалтме, нунын могай льгото да услуго дене пайдаланен кертмышт нерген ача-ава-влаклан республикын тазалыкым аралыме, социальный вияҥмаш, образований да науко, чоҥымо паша, архитектур да илыме вер ден коммунал озанлык министерствыла, Россий Пенсий фондын Марий Элысе отделенийже, Йошкар-Ола ола округын администрацийже, Марий Эл Республикын спорт сооруженийже-влак управлений гыч пашаеҥ-влак радамлын каласкалышт. Кучем орган пашаеҥ-влак дене шинчаваш мутланаш пуалтме йӧн дене ача-ава-влак кугу куан дене пайдаланышт да ойлышо кажне еҥлан йодышым ятыр пуышт. Шижалте: нуным тургыжландарыше йодышат, ӧпкеат шуко погыненыт. Тиде поснак йоча врач-влак деке приёмыш логалме, ешлан мланде участкым ойырымо, шагал поянлыкан, йорло, нужнан илыше еш радамыш кӧ пурталтме, у тунемме ий вашеш школлаште тӱрлӧ кӱлешлан оксам погымо нерген мутланымышт годым палдырныш. Пытартышыж нерген «Большая семья» организацийын школ да школ деч ончычсо воспитаний йодыш-влак шотышто группын вуйлатышыже  мом да кузе шулдынрак ышташ лийме нерген каласкалыш.

Шуко шочшан еш-влаклан кучем дене кылым ышташ да лекше йодышышт дене полышым налаш куштылгырак лийже манын, ойлышо-влак кажныже гаяк  паша телефон номерыштым пуышт. Южыштлан посна полшаш сӧрен, нунын данныйыштымат нальыч.

Икманаш, тиде семинарыште кӧ лийын гын, кажныже ятыр пайдале уверым пален налын.

Любовь Камалетдинова.

Опубликовать в Одноклассники

Добавить комментарий