17 апрельыште Звенигово районысо Красногорский поселкышто верысе предприятий, учреждений да организаций-влакын директорыштын Советыштын заседанийже эртен. Тушко Марий Эл Республик правительстве председательын алмаштышыже Илга Дравниеце миен.
Погынымаште Красногорскысо районный эмлымверын ончыкыжым пашам ыштымыж шотышто йодышым каҥашеныт. Молан манаш гын терапевтический отделений, лабораторий петыралтыт, пашаеҥ-влакым шагалемдат манме ой калыкыште шарлен. Тӱҥ врачын пашажым шуктышо Олег Романенко умылтарен: ончыкыжым эмлымвер уэмдалтеш, но отделенийым петырыме, пашаеҥ-влакым шагалемдыме нерген мутат лийын огыл. Мӧҥгешла, тудын пашажым саемдаш утларак вийым кучылташ шонат. Иктешлыме семын Илга Дравниеце палемден: Красногорскысо районный эмлымвер ончычсо семынак пашам ышташ тӱҥалеш.
Л.Камалетдинова.
