ПАТЫРЛЫК

Ача-авам, родо-тукымым, элнам аралат

Российын армийже тыныслыкым да калыкын ласка илышыжым аралыме шотышто кеч-кунамат ӱшанле эҥертыш лийын да лиеш. Салтаклан корно военкомат гыч тӱҥалеш. Лач верысе военный комиссариатлашке рекрут-шамыч толыт. Пытартыш жапыште нуныланат ойыраш йӧн пуалтын: идалыкым срочный службышто эрташ але контракт почеш служитлаш.    Икманаш, Российын армийже шочмо элнам арален кертше манын, кугыжаныш чылажымат ышташ тырша. 

– Тений военный комиссариатым ыштымылан ик курым теммым палемдена. Майыште Йошкар-Ола военкоматым ыштымылан 100 ий темеш. Мыят тиде паша дене пеҥгыдын кылдалтынам, сандене ӧрдыж гыч гына эскерен ом керт, – манеш Йошкар-Оласе военкоматыште военный комиссарын алмаштышыже А.Курочкин. – 1994-2002 ийлаште Килемар районысо военкоматыште службым эртенам. Кок ийже алмаштыше семын, а вара – районысо военкоматым вуйлатенам. Ты жапыште поро кумылан еҥ-влак дене вашлияш логалын. Южышт дене кызытат пеҥгыде кылым кучена. Тунам призыв пагытыште рвезе-влак порысым шуктымо деч шылын огытыл. Адакшым тыгайже ушышкат пурен огыл. Вет срочный службым эртыдыме рвезым  «армийлан йӧрдымӧ» маныныт, да ӱдыр-шамычат пешыжак йӧратен огытыл (авт.шыргыжеш). Рекрутым армийыш пӱтынь ял дене ужатеныт. Самырык еҥ порысшым кугешнен шуктен. Тиде пашаш школ директорат, верысе администраций вуйлатышат рӱжге ушненыт. Мутлан, мый  Зинаида Константиновна Скворцовам, Юрий Анатольевич Кукушкиным тачысе кече семын шарнем.

Аркадий Максимович шочынжо Марий Турек район гыч. Таллинысе высший военно-политический строительный училище (1981-1985 ийла, «отличнылан» тунем лектын) деч вара Приволжский военный округышто службым эртен. Кӱшнӧ ойлымо семын 1994-2002 ийлаште Килемар районышто военный комиссар лийын.

Илышыже службо, военный паша дене кылдалтын, но… Романтике шӱлышан пӧръеҥ манам гынат йоҥылыш ом лий. 2000 ийыште Современный Гуманитарный Академийым тунем лектын. Уло кумылын сылнымут аланышке ушнен. Икмыняр почеламутшылан семымат келыштареныт. Аркадий Максимович поэзийыштыже пӱртӱс, шочмо-кушмо вер, ава темым тарватен.

Службо жапыште кумда элнан тӱрлӧ кундемыштыже кӱлешан заданийым шуктен. Мутлан, 1986-1988 ийлаште химический оружийым пытарыме шотышто объект-влакым чоҥымаште лийын, 1988-1990 ийлаште Чернобыльысе АЭС-ыште аварийым пытарыше специалист-влакым ямдылен. 2004 ийыште служебный командировко дене Чечняште лияшат логалын.

– Чын пӧръеҥ кеч-могай жапыште шке элжым арален кертеш. Тыгак тудо ача-аважым, родо-тукымжым, пошкудыжым, пелашыжым, икшывыжым арален сеҥышаш, нунылан ӱшанле эҥертыш лийшаш. Шкежат физически таза, духовно, морально, психологически сай качествыж дене кӱшнӧ лийшаш. А тидым изинекак вияҥдыман. Патриотизм шӱлыш дене изинекак авалтын кушман, – манеш А.Курочкин.   

 

Кумданрак — «Марий Эл» газетын
2018 ий 20 апрельыште лекше номерыштыже лудын кертыда.

Е.Эшкинина.
М.Скобелевын фотожо.

Опубликовать в Одноклассники

Добавить комментарий