Тушто Марий Элын турист отрасльжын участникше-влакын пырля пашам ыштымышт, инвестиций проект-влакым вияҥдыме, кеҥеж вашеш мемнан регионыш толаш кумылан турист-шамычын чотыштым кугемдыме дене кылдалтше ятыр йодышым каҥашеныт.
Республикын брендшым ыштыме да тудым илышыш шыҥдарен толмо нерген брендинг агентствын вуйлатышыже Анастасия Аксенова каласкален. Тыгак участник-влакым икте почеш весе тенийсе турист сезонышто мо уым ышташ палемдыме дене палдареныт. Ӧрдыж вел гыч толшо-влакын кумылыштым налын кертше сай шонымаш ятыр. Тиде — Йошкар-Оласе Турист-увер рӱдерын у проектше-влак; Ботанический садын экскурсий маршрутшо; MariLand каныме базын у проектше; «Пазар площадь» кевыт- тоштер каныме базым почмаш; «Курыкмарий-влакын кундемышт» турист маршрут; Национальный художественный галерейын экскурсий программыже, Т.Евсеев лӱмеш национальный тоштерын комплексный тӱвыра- образовательный маршрутшо ден программыже-влак да молат.
Тенийсе сезонышто ыштышаш паша ятыр. Турист отрасльыште ыштыше-влак грант проект пашашкат ушнаш, у маршрут-влакым (эсогыл гастрономий дене кылдалтшымат) почаш шонат. Китай, Италий, Японий дене пырля туризмым вияҥдыме ден кылдалтше партнерский программым илышыш шыҥдараш палемдыме. FIFA-2018 футбол дене тӱнямбал чемпионатым эртарымашкат чолган ушнаш шонымаш уло. А тидлан Юл кундемысе регион-влак дене пырля пашам ыштыман…
— Турист отрасльыште ыштыше-влакын тӱҥ задачышт — мемнан деке толшо турист-влак веле огыл, тыште илыше-шамыч шкештат шочмо верыштым йӧратышаш улыт, — палемден Марий Элын самырык-влакын политикышт, спорт да туризм министрже Лидия Батюкова. Тудо республикысе турострасльым вияҥдаш полшышо ойртемалтше еҥ-влаклан министерствын туаштымашыжым кучыктен. Палемдалтше-влак коклаште Марий тӱр тоштерым почшо кидмастар Ираида Степановат лийын (снимкыште).
С.Носова.
