Лаштыкнан тачысе унаже — Марий самырык театрын артистше Артём Иркабаев. Артист пашаш тудо И.С.Палантай лӱмеш тӱвыра да искусство колледжыште тунеммыж годымак тӱҥалын да ынде лу ий чон йодмо сомылжым шукта: тӱрлӧ койыш-шоктышан герой-влакым модеш, образым почын пуымыж дене куандара, шортара, шонаш тарата.
Артём Пошкырт кундем Мишкан районысо Тымбай ялыште шочын-кушкын. Верысе школ деч вара И.С.Палантай лӱмеш тӱвыра да сымыктыш колледжыште шинчымашым пойдарен. Дипломым налмеке, шочмо Пошкырт кундемышкыже пӧртылын да верысе культур пӧртыштӧ вӱдышӧ специалист лийын. Но тиде гына тудлан шагалла чучын, сандене рвезе мӧҥгеш Йошкар-Олашке толын да МарГУ-со тӱвыра да искусство факультетыш тунемаш пурен. Тунамак тудо Марий самырык театрын коллективышкыже ушнен.
— Паша кеч-кунамат куаным кондышаш. Театрлан мыят изинекак шӱмаҥынам. Ялысе школышто тунемме годым марий йылме ден литературым туныктышо Соня Ермолаевна Сагитова, музыкым туныктышо Анна Кутлубаевна Байбулатова театр сымыктышлан кумылаҥденыт. Почеламутым сылнын лудаш, изирак сценкыште, спектакльыште модаш моткоч келшен, — парт коклаште шинчыме пагытшым шарналта Артём.
Самырык актёр икымше гана «Ӧртӧмӧ он» спектакльыште Эшкынайын образыште сценыш лектын. Тиддеч вара тудо режиссерын ӱшанжым сулен да тудлан Шапкинын («Гроза»), Митян («Пӧртыл, ӱдырем!..»), Мишан («Вис-вис пушан орлыкем»), Измаилын («Йоргасола каче-влак») рольыштым ӱшанен.
2009 ийысе театр тургымышто А.Иркабаев театр искусствыш келгынак пурен: тӱрлӧ планан роль-влакым «Чодыраял Элыксандр» (Аркадий), «Я.П.Майоров-Шкетан» (Пиштерский) спектакльлаште модын. Руш классик А.Пушкинын «Руслан и Людмила» сылнымут спектакльыште тӱҥ рольым чоҥымыж дене поснак чылалан келшен.
Ятыр спектакльыште модмо пагытыштак Артёмлан салтак илышыш ушнаш логалын. Ик ий службым эртымеке, уэш чон йодмо пашашке ушнен. «Кунам кӱдырчӧ кӱдырта» (Айдуш) спектакльыште, «Про Федота-стрельца, удалого молодца» (Федот) йомакыште модын.
-Тиде рольым Сергей Мамаев дене модынна. Виян артист дене дублёр лияш пеш тургыжланенам ыле, — палемда Артём. — Но ме чылан ик еш семын келшен пашам ыштена, икте-весылан полшена, сандене кеч-могай нелылык дечат лекташ куштылго.
Кумданрак — «Марий Эл» газетын
2018 ий 20 апрельыште лекше номерыштыже лудын кертыда.
А.Байкова.
