Тачысе лаштыкнан унаже Наталия ДУДИНА – Шернур район Купсола ялын ӱдыржӧ. Марисола кыдалаш школым тунем пытарымек, МарГУ-што Калык тӱвыра да тӱвыра кокласе коммуникаций институтышто марий-англичан пӧлкаште тунемын. Кызыт тудо Чарла кремльыште пашам ышта да марий тӱвырам, йылмым вес калык коклаште шарымаште, республикыште, Йошкар-Олаште туризмым вияҥдымаште тырша.
– Пытартыш жапыште республикыштына туризм паша ворана. Чарла кремльыш шукырак туристым сымыстараш мом ыштеда?
– Ме тӱвыра да историй комплекс семын тӱрлӧ мероприятийым эртарена. Экскурсант-влаклан ола мучко экскурсийым гына огыл, а кечыгутлан шкешотан программым чоҥаш тыршена: марий фольклор ансамбль дене интерактивный ужаш, марий сийым тамлен ончымаш, йочалан модмаш-влак, тыгак тӱрлӧ мастер-класс. Икманаш, калык дене жапым оҥайын да пайдалын эртараш тыршена. А Йошкар-Олаш шукырак турист толжо манын, эн ондак сай инфраструктур лийшаш. Тыгак уверымат шаркален моштыман. Туроператор ден туризм дене кылдалтше пашаеҥ-влак вес ола, регион дене кылым пеҥгыдемдышаш улыт. Мутлан, ме Киров оласе «Мир открытий» турфирме дене ятыр ий пашам ыштена.
– Палем, тый сылнымутлан шӱман улат. Но пытартыш жапыште возымет огеш кой. Амалже могай?
– Очыни, йоча пагытыште шукын почеламут корнылам шочыктеныт. Мыят тыгак. Ялыштына тунам йоча шагал ыле, садлан уремыште модаш нигӧ дене лийын. Тыге яра жапыште почеламутым сераш тӱҥалынам. Шочмо ялем, пошкудем, йолташем-шамыч нерген возенам. Марий кугыжаныш университетыштат тунеммем годым икмыняр почеламутым серенам. Тӱрлӧ вере савыкталтынам, но илыш корнем сылнымут дене кылден шуктен омыл.
Кызыт уло жапем тунеммашлан да пашалан ойырем, эсогыл кечывал жапыште англичан йылмым тунемаш коштам.
– Тугеже йот йылмым палымаш тылат полша?
– Англичан йылмым удан огыл палем, но шуаралташ эре кӱлеш. Йот йылме пашаште веле огыл, тачысе илышыште мылам моткоч полша, поснак вес калык дене кылым ыштыме годым.
Мемнан вузлаште йот элла гыч тунемше студент-влак денат пеҥгыде кылым ыштена. Тӱвырана дене вес калыкымат палдарыман. Тыге тений МарГУ-н «Клуб интернациональной дружбы» ушемжын еҥже-шамыч дене чакрак палыме лийынна, поэзий, йылме касышке погыненна. Йот элла гыч толшо студент-влак моткоч поро да талантан улыт. Вашке ме нунылан экскурсийым англичанла эртараш тӱҥалына.
Кумданрак — «Марий Эл» газетын
2018 ий 20 апрельыште лекше номерыштыже лудын кертыда.
Л.ШАБДАРОВА.
(Фотом еш альбом гыч налме.)
