28 март гыч 5 апрель марте Марий Элын ссузлаштыже тунемше-шамычын профессионал мастарлык дене всероссийский олимпиадын регионысо этапше эртен. Ӱдыр-рвезе-шамыч шинчымаш ден моштымашыштым ныл профильный направленийыште ончыктеныт. Нуно теорий да практике дене кылдалтше заданий-влакым ыштеныт.
28 мартыште Йошкар-Оласе технологический колледжыште «Информатике ден вычислительный технике» номинацийыште 14 еҥ таҥасен. Сеҥышыш «Политехник» кӱшыл колледжын тунемшыже А.Иванов лектын. Тудо республикнан чапшым Москваште Российысе олимпиадыште аралаш тӱҥалеш.
30 мартыште «Машиностроений» номинацийыште моштымашыштым 10 студент ончыктен. Олимпиаде Марий радиомеханический техникумышто эртен. Икымше верым МРМТ-н тунемшыже В.Шибаковлан пуэныт. Тудо олимпиадын пытартыш этапышкыже Саратовыш кая.
3 апрельыште Марий политехнический техникумышто «Ялозанлык, чодыра да кол озанлык» номинацийыште шке шинчымашым 9 тунемше терген. Сеҥыше Марий чодыра озанлык техникумын тунемшыже А.Блохин лийын. Ты номинаций дене финал Комсомольск-на-Амуре олаште лиеш.
5 апрельыште Йошкар-Оласе аграрный колледжыште «Технике, мланде ӱмбалне коштшо транспортын технологийже» номинацийыште 8 тунемше ӱчашен. Икымше верыш Марий чодыра озанлык техникумын студентше Н.Ефремов лектын. Тудо кундемнан чапшым всероссийский олимпиадын финалыштыже Сыктывкарыште арала.
Л.ШАБДАРОВА.
