СОЦИАЛ ИЛЫШ

Социальный илыш: Ветеранлан – илыме верым

Марий Эл Кугыжаныш Погынын черетан сессийжылан ямдылалтме кышкарыште Социальный вияҥмаш шотышто комитет Кугу Отечественный сарын ветеранже-влаклан илыме верым ситарыме йодышым ончен. 

Регионысо Социальный вияҥмаш министерствын данныйже почеш, 2009-2018 ийлаште республикышкына тиде цельлан федеральный бюджет гыч 3005,8 миллион теҥге пурен. 2010 ий апрельыште 2005 ий 1 марте йотке учётыш шогалше ветеран-шамычлан илыме верым ситарыме пашам мучашлыме. Тудын полшымыж дене 121 еҥ илыме вержым саемден кертын.

2018 ий 1 апрельысе данный почеш, республикыштына верласе кучем орган-влак сарын 2927 ветеранжым, инвалидшым, участнишкым да нунын тулык ватышт ден шочшыштым учётыш шогалтеныт.

2010 ий гыч таче кече марте илыме верым налаш правам пуышо 2910 свидетельствым ойырымо, тышечын 2907 документым пайдалын кучылтмо. 988 еҥ (34%) налме пачерыште ила, 440 еҥ (15,1%) куснаш гына шона, 50 утла процент, 1479 еҥ, илыме верым шочшыжлан, родыжлан ойырен, арендыш пуа, ужален, тазалык начарлан кӧра посна лектын ок керт, весын ончымыж дене веле ила, колен.

Ветеран-шамычлан илыме верым ситарыме паша умбакыже шуйна. 2018 ий 1 апрельлан Кугу Отечественный сарын илыш гыч кайыше участникшын ешыжлан шотлалтше 17 еҥлан илыме верым саемдаш кӱлын. Ончылгоч пуымо данный-влак почеш, учётыш эше 16 еҥ шогалын кертеш, ты шотыштак – Кугу Отечественный сарын кок ветеранже.

Ушештарена, Кугу Отечественный сарын ветеранже-влаклан да нунын тулыкеш кодшо ватыштлан илыме верым саемдаш ойырымо субсидийын кугытшо – 1172 052 теҥге.

М.ИВАНОВА.

Опубликовать в Одноклассники

Добавить комментарий