УВЕР ЙОГЫН

Марий Элыште колызо-влак ий ӱмбалне кок шагат «шинченыт»

Республикысе уголовно-исполнительный системын пашаеҥже-влак коклаште кол кучымаш дене таҥасымаш лийын, палдара Россий ФСИН-ын Марий Элысе управленийжын пресс-службыжо. 

Йӱлашке пурышо тиде таҥасымаш тений Килемар районысо Шӹкшансола ял воктене эртен.

Таҥасымаш тӱҥалмеке, кок минут гычак «Икымше кол» номинацийыште сеҥыше пале лийын. Эн ончыч колым 3-шо номеран исправительный колонийыште тыршыше Олег Герасимов кучен.

Условий почеш, участник-влак ий ӱмбалне кок шагат колым кученыт. Тылеч вара иктешлымашым ыштеныт. Нелыт шот дене пиал адакат ты колонийын командыжланак шыргыжалын. Олег Герасимов ден Александр Келушев чылаже 2 килограммат 230 грамм колым кученыт.

Кокымшо верыш следственный изолятор гыч Александр Васильев ден Анатолий Романов лектыныт. Нунылан 1 килограммат 780 грамм кол логалын.

Кумшо верыште управленийын сборныйжо лийын: Евгений Швецов ден Константин Христолюбовын эҥыримышкышт пижше кол ик килограммат пеле деч изиш шагалрак погынен.

Эн кугу колым ты гана 6-шо номеран исправительный колоний гыч Сергей Коряковцев кучен.

Организатор-влакын дипломым ямдылымышт жапыште участник-шамыч эше ик конкурсым эртарен шуктеныт: нуно кол кучаш рожым шӱтеныт. Тыштыже Йошкар-Оласе СИЗО-н пашаеҥже-влак ойыртемалтыныт.

Сеҥыше-влакым ий ӱмбалнак саламлыме деч вара погынышо-влак мӧҥган-мӧҥгышкышт каяш вашкен огытыл. Таҥасымаш деч вара нуно умбакыжат колым кученыт. Но ындежым ласкан, тургыжланыде, вашкыде…

Л.Камалетдинова.
А.Канатеевын фотожо.

Опубликовать в Одноклассники

Добавить комментарий