Икшыван еш-влакым подоходный налогым тӱлымӧ деч утарыше законопроектым РФ Кугыжаныш Думын депутатше-влак икымше лудмаште приниматленыт.
Ушештарена: 2018 ий январьыште Российыште у социальный полышым пуымо мерым илышыш пуртеныт – икшывым ыштымылан але ашнаш налмылан еш-влаклан кажне тылзын оксам тӱлаш тӱҥалыныт. Тиде у льгото дене тений 1 январь деч вара шочшо але ашнаш налше еш-влак пайдаланен кертыт. Тыгодым ешын кажне еҥлан шотлымаште доходшо илен лекташ кӱлшӧ окса кугыт деч 1,5 пачашлан кугу лийшаш огыл. Закон почеш, тиде окса гыч 13 процент налог налалтеш. Да тиде амал дене пособийын кугытшо ятырлан иземын.
Кодшо арнян Кугыжаныш Думын депутатше-влак у проектым каҥашеныт. Тушто икымше йоча шочмылан але ашнаш налмылан тылзе еда тӱлымӧ окса гыч да кокымшо йочам ыштымылан але ашнаш налмылан ава капитал гыч НДФЛ-ым налаш огыл манын темлалтеш.
Парламентарий-влакын решенийышт нерген Кугыжаныш Думын Марий Эл деч депутатше Сергей Казанков тыге ойлен: «Тиде законопроектым икымше лудмаштак пеҥгыдемденыт: чын да кӱлешан законопроект-влакым чыла фракцийын депутатше-шамыч ик йӱк дене сайлан шотлат. Теве мом умылыман: верлаште кучем-влак материальный полышын кугытшым ешарен огыт керт. А теве Москваште парламентарий-влак тылзе еда тӱлымӧ кугыжаныш выплатылан налогым кораҥден кертыныт».
Л.Камалетдинова.
