СОЦИАЛЬНЫЙ ИЛЫШ

30 ий темме лӱмеш — пайрем

21 мартыште Йошкар-Олаште, Мер-политик рӱдерыште, Ветеран-влакын Марий Эл Республикысе организацийжылан 30 ий теммылан пӧлеклалтше мероприятий эртен.

Тидын дене вуйлатыше да тудын енже-влакым саламлаш Россий президентын Юл кундем федеральный округышто полномочный представительжын аппаратшын тӱҥ федеральный инспекторжо Павел Логинов, республикысе правительстве вуйлатышын алмаштышыже, социальный вияҥмаш министр  Надежда Климина, республикысе правительстве вуйлатышын алмаштышыже, здравоохранений министр Владимир Шишкин, образований да науко министр Галина Швецова, тыгак ола администраций гыч еҥ-влак толыныт.

Пайремыш погынышо-влакым залыш пурымаште кадет класслаште тунемше-влак вашлийыныт, а  фойеште военный оркестр шоктен. Тидыже ветеран-влакын кумылыштым поснак нӧлталын.

Республикысе ветеран-влак советын председательже Раиса Кулалаева, Павел Логинов, икмыняр моло еҥ саламлен ойлымаштышт тиде организацийын пашам чолган ыштымыжым палемденыт да умбакыжат тыгак тыршаш тыланеныт.

Ветеран-влакым кадет ден  юнармеец-шамыч саламленыт. Пытартышлан И.С.Палантай лӱмеш республикысе тӱвыра да сымыктыш колледжын тунемшыже-влак изирак концертым ончыктеныт.

Л.Камалетдинова.

Опубликовать в Одноклассники