С.Г. Чавайн лӱмеш калыкле лудмыверыште Советский районысо Кельмаксола кундемын чолга еҥже, краевед Леонид Киртаевын у книгажын презентацийже эртен. Тудо «Письма, опаленные войной» маналтеш.
Тиде — авторын кудымшо книгаже. Кодшо кеҥежым гына Кельмаксола ялын пайремже годым тудо шочмо кундемжылан пӧлеклалтше кок у книга дене палдарыш. Леонид Никаноровичын чолгалыкшылан ӧраш гына кодеш. Тудо шкежат ятыр жап верысе администрацийым вуйлатен. Кызытат шочмо кундемже верч тургыжлана, тудым йӧрата да шымла. Сулен налме канышыш лектын гынат, тӱрлӧ изданий дене кылым куча, кундемжын историйже, калыкше нерген нунын гоч калскала. Таклан огыл шке жапыштыже «Патиорт России» медаль, тӱрлӧ чап грамот дене палемдалтын.
Ынде ятыр ий тудо шке кундемыштыже «Поиск» военно-патриотический кычалше клубым вуйлата. Самырык-влакым ты пашалан кумыланда. Тудын тыршымыж дене Кугу Отечественный сар годым сӧй пасуэш вуйым пыштыше 40 земляк-салтакын пӱрымашыже, нуным тойымо верышт рашемын. Нунын подвигышт шарнымашеш кодшо манын, тудын тыршымыж денак сарын участникше-влакым шарныме лӱмеш Воинын чапшылан монументым шогалтыме. Воктекыже колышо салтак-влакын шӱгарышт гыч мландым конден пыштыме. Кельмаксола кундемым чапландарыше да илыш гыч кайыше еҥ-влакын сурт пырдыжышкышт шарнымаш оҥам пижыктат.
Авторын пытартыш возымо книгаже 200 экземпляр дене гына лектын. Тудо сарыште лийше салтак-влакын серышышт дене палдара. Кажныштыже — сарын кочо лаштыкше, шӱлышыжӧ. Колыштат да шинчавӱд лектеш. А нине серышым Леонид Никанорович ятыр ий кычалын да чумырен толын. Тудын архивыштыже республикысе икмыняр район гыч салтак-влакын мӧҥгышкышт возымо серыш-шамыч улыт.
Леонид Никаноровичлан презентацийым эртараш Кельмаксола школын туныктышыжо, лудмывер пашаеҥ, йолташыже-влак полшеныт. Вашлиймаш пеш поро шӱлышеш эртен. Мучашлан Леонид Киртаев С.Г.Чавайн лӱмеш лудмыверлан шкенжын книгаже-влакым пӧлеклен.
С.Носова.
