Могай амаллан кӧра икшывым школ гыч луктын колтен кертыт?
А.Федосеева.
Йошкар-Ола.
Йодышлан Медведево районысо прокурорын кугурак полышкалышыже С.Г. Белова вашештен:
— Закон почеш, икшывын школым тунем пытарымекыже але жап деч ончыч тунеммым чарнымыже годым (вес школыш кусаралтеш, образовательный программым умылен ок керт але тунемме планым ок шукто, дисциплине дене кылдалтше проступкым ыштен, школыш тунемаш налме радам пудырталтын, школ петыралтын да молат) веле тудым луктын колтен кертыт.
Дисциплине дене кылдалтше проступкылан, лачшымак школын уставшым, образовательный пашам шуктымо да организоватлыме йодыш шотышто организацийын локальный нормативный актшым, внутренный распорядке правилым пудыртымылан да шуктыдымылан икшывым школ гыч луктын колтен кертме йодыш ава-ача-влакым эн чот тургыжландара.
Но йочам школ гыч луктын колтымаш школын обязанностьшылан огыл, правжлан шотлалтеш. Чыла случайыште школ дисциплинарный взысканий дене кылдалтше моло мерым ыштен кертеш. Мутлан, шижтарен каласа але выговорым пуа.
Кунам школ икшывым луктын колтен огеш керт?
1) икшывылан 15 ий темын огыл гын;
2) школ деч ончысо, тӱҥалтыш общий образований програме-влак почеш тунемеш гын;
3) тазалык шотышто ойыртемалтше (психический вияҥмашыже вараш кодеш, уш-акыл шотышто тӱрлӧ чер уло) икшывылан шотлалтеш гын;
4) черле, каникулышто, академический отпускышто, азам ыштыме, азам ончымо дене кылдалтше отпускышто улеш гын;
5) тунемше шотышто ончыч лукмо выговор, шижтарымаш лийыныт, но срокышт эртен але кораҥдалтыныт гын.
С.Носова ямдылен.
