Апрель гыч пенсийым кӱзыктымӧ нерген ойлат. Тиде чын увер мо?
Н.Лаврентьев.
Морко район.
Чын увер. Российыште пашам ыштыше да ыштыдыме пенсионер-шамычын пенсийыштым 1 апрель гыч 2,9 процентлан кӱзыктат. Тидын дене келшышын, Марий Элыште илыше 17 тӱжем утла пенсионер (нунын кокла гыч 16185 еҥ социальный пенсийым налеш) тиде тылзе гыч кугурак пенсийым налаш тӱҥалеш.
Социальный пенсий кокла шот дене 235 теҥгелан кӱза да 8367 теҥге лиеш. Военнослужащий-влакын, тыгак нунын ешыштлан шотлалтше еҥ-шамычын пенсийышт 314 теҥгелан кӱза да 11145 теҥге лиеш. Техногенный але радиационный катастрофылаште тазалыкым пытарыше-влакын пенсийышт индексаций деч вара 12819 теҥге лиеш.
Закон почеш кокымшо пенсийым налше граждан-шамычынат пенсийышт кӱза. Тиде тӱшкашке военный травмым налше инвалид, Кугу Отечественный сарын участникше-влак, нунын тулык ватышт, ӱмыр лугыч лийше военный-шамычын ача-авашт да «Житель блокадного Ленинграда» чап знакын озаже-влак пурат.
Индексаций тиде ийын икымше да пытартыш ок лий. Августышто Пенсий фонд 2017 ийыште пашам ыштыше пенсионер-шамычын страховой пенсийыштым корректироватлаш палемден.
М.Иванова
