ТАЧЕ ЯЛЫШТЕ ЯЛОЗАНЛЫК

Анатолий Оразаев: «Шке верыштем улам»

«Шке верыштем улам», — ойла Морко район Шлань ял гыч амалкалче А.Оразаев

Шагалже тыге ойлен кертеш, а тудо… кертеш. 1986 ийыште Марий политехнический институтышто (кызыт ПГТУ) чодыра озанлык инженер-механик специальностьым налын, Зеленогорский чодыра комбинатыш направлений дене толын. Тушечын Уньжасе чодыра пунктыш механиклан колтеныт. Ик ият пеле армийыште служитлымеке, тушкак пӧртылын да 2002 ий марте пашажым шуктен: ончыч – механик, а пытартыш куд ийжым – чодыра пӱчшӧ мастер семын. Ту ийлаште чодыра комбинатым лесхозыш савыреныт, а производствым ™шӱт чодыра промышленный предприятийыш кусареныт. Вара предприятийжат панкрутыш лектын…

Но Анатолий Иосифович йӧратыме пашажым кудалтен огыл – «Передовик» озанлыкым Г.С.Григорьев вуйлатыме жапыште пилораме ден столяр цехын пашажым ик ий виктарен. А вара, 2004 ийыште, шке бизнес пашажым тӱҥалын, да адакат – чодырам пӱчмӧ, перерабатыватлыме да услугым пуымо дене кылдалтшым. Шочмо Шлань ялже воктенак яра мландыште пилорамым почын. Ола гыч лӱмын ленточный пилорамым налын конден. Тыгайже чодыра пунктыштат лийын огыл — верлаште у йӧнлан эҥерташ эше тӱҥалыныт веле.

— Ынде латныл ий чодырам пӱчкына, кондена, йыгена, ужалена. Продукцийна тӱрлӧ вере колталтеш. Куэ оҥанам Волжскысо «Промтекс» ООО йоча ден кугыеҥлык мебельым ышташ кучылтеш. Писте оҥана дене Йошкар-Ола гыч предприниматель-влак изак-шоляк Стариковмыт вагонкым ямдылат. Кож материалнам верысе калык налеш, Татарстан гыч толын наҥгаят. Эше яшлык ден поддонлык материалнам Тольяттисе «Барс» ООО-лан колтена, — каласыш индивидуальный предприниматель  А.И.Оразаев.

А чодыражым тудо Марий Турек районысо «Ямбатр» ООО деч руаш налеш. Руашыже лишнат, тораштат логалеш. Тений делянкылам тораштырак ойырымо – коло меҥге чоло кудалышташ перна. Чодырам тӱҥ шотышто телым руат, кеҥежым перерабатыватлат. Кондымо шапаш шыже марте сита.

— Кеҥежым пилорамна кок смене дене ышта, кызыт — ик смене дене. Кызыт куд еҥ чодыраште, кум еҥ пилорамыште тыршат, а кеҥежым чылан пилорамыш куснат, —  рашемдыш Анатолий Иосифович да ешарыш: — Эше ик трактористна уло – Геннадий Пайгельдинович Терентьев. Трактор денат, машина денат кудалыштеш. А Василий Арсентьевич Оразаевын тӱҥ пашаже – рамщик, но кызыт чодырам руымаште тракторист сомылым шукта. Коктынат тӱҥалтыш гычак ыштат, тӱҥ эҥертыш улыт.

Тыгай эҥертыш дене пашажат ушнен толеш. Теве йыген ямдылыме оҥам машинаш оптен колташ кӱлеш ыле гын, Геннадий Пайгельдинович чодыра гыч жапыштыже толын шуо да пашалан пиже веле. Пилорамыште тыршыше-влакат пашаштым чарнен полышкалаш ямдылалтыч…

Кумданрак — «Марий Эл» газетын
2018 ий 30 мартыште лекше номерыштыже лудын кертыда.

Юрий Исаков.

Опубликовать в Одноклассники

Добавить комментарий