Марий Элыште ОРВИ да грипп дене черланыме ситуаций ончычсо гаяк неле. Кодшо арнян регионыштына нине чер дене черланыме куд тӱжем утла случайым регистрироватлыме. Тиде чот эпидемий лондемым 49,8 процентлан вончымо нерген ойла.
Грипп дене 30 кугыеҥ да 15 йоча черланеныт. Лабораторий шымлымаш рашемден: 33 еҥым В гриппын вирусшо авалтен, куд случай «сӧсна» грипп дене кылдалтын, моло куд пациентлан Гонконг грипп пижын.
ОРВИ да грипп дене черланыше-влак ынышт шукем манын, республикысе 33 школышто 80 классым, школ деч ончычсо шинчымашым пуымо 27 тӧнежыште 34 группым карантиныш петырыме. Морко, Звенигово да Медведево районласе 11 школышто, тыгак Оршанке, Морко да Марий Турек районласе кум йочасадыште туныктымо да воспитатлыме пашам йӧршын чарен шогалтыме.
Кодшо арнян тӱвыра, образований да спорт дене кылдалтше кандаш мероприятийым вес жаплан кусарыме: кокытшым – республик кӱкшытаным, кудытшым – район кӱкшытаным.
Марий Элыште карантин умабкыже шуйна. Ситуацийым Роспотребнадзорын Марий Элысе виктемже контрольышто куча.
М.ИВАНОВА.
