ПАТЫРЛЫК СПОРТ

Онар тукым: «Пӱртӱсым аклен, тудым умылен, арален илыман…»

«Таза капыште – таза уш», – маныт калыкыште. Физически таза лияш физкультур да спорт дене пеҥгыде кылым кучыман. Спорт койыш-шоктышым пеҥгыдемда, шонымо задачым шукташ, нелылыкым чытен лекташ, виян лияш полша. Газетнан унаже – тачысе кечылан ялысе самырык тукымым таза илышлан кумылаҥдыше, тудын волгыдо, таза илышыж верч вуйын шогышо энтузиаст, чолга мер пашаеҥ А.Щербаков. 

Верысе-влакын йодмышт почеш

Александр Николаевич Провой кундемысе Поянсолаште верысе ӱдыр-рвезе-влаклан яра жапыштым пайдалын эртараш у деч у йєным кычалеш. Тидым шотыш налын, ялыште тӱрлє клубым чумырышо «У вий» ушемым почыныт. Тушто тыгак таза илыш-йӱлам кучымылан да патриотически воспитатлымылан кугу тӱткышым ойырат.

– Тыгай шонымаш ончычак лийын. Самырык тукым физически да творчески шуаралтшаш, шинчымашым келгемдышаш. Мутлан, культур велымат, спортыштат. Тӱҥалынже чылажат армий деч вара. Службым эртен, мєҥгыш пєртылмекем, верысе-влак мыйым ялысе клубым вуйлаташ йодыныт. Тушто куштымаш касым, дискотекым эртараш кӱлын. Вет мый службым эртымем годым «ди-джей» семынат лийынам. Паша у огыл, сандене тыгай темлымаш дене келшенам веле. Тыге культур пашалан эшеат шӱмаҥынам. Йошкар-Оласе культур училищын режиссёр отделенийыштыже тунемынам, тыгак киномеханик да видеотехникым кучылтмо шотышто курсым эртенам. Варажым тӱрлє культур учрежденийыште автоклуб, тыгак  художественный вуйлатышыланат пашам ыштенам. Икманаш, шканем мо келшен – тудо пашам ойыренам. Сандене кызытат республик кӱкшытан тӱрлє семинарлаште, квалификацийым келгемдыме курслаште лияш, конкурслаште участвоватлаш тыршем, – манеш шкеже.

«Акпарс», «Шурави», «Алмаз»…

А.Щербаков ойыртемалтмыжлан, сеҥышыш лекмыжлан ятыр Чап грамот дене палемдалтын. Коло утла ий пашам ыштыме жапыште тудо оҥай, молылан келшыше тӱрлє клубым почын. Мутлан, «Феникс» диско-клуб, ӱстембал теннисла, бильярдла, шашке да шахмат дене модаш клубла ден секцийлашке кумылан ятыр еҥ коштеш. Неле атлет-влаклан келшыше «Атлант», эрвел единоборство дене «Каратэ», тыгак военно-патриотический ныл клубын пашажым мокталтыман. Тиде – «Алмаз», «Шурави», «Акпарс», «Русь» да тулеч молат. А тӱҥалтышыжлан садак верысе «У вий» ушем шотлалтеш. Тудыжым 2005 ийыште почмо. Южо клубшо идалык але кок ий пашам ыштен, вара ик жап гыч уэш почылтын, вияҥын гына. Тыгайжылан «Феникс» диско-клубым шотлыман. Миф дене кылдалтше кайык семынак тудо ик гана веле огыл я петырналтын, я уэш пашам ышташ тӱҥалын. Самырык-влаклан тиде клубым Александр Николаевич 16 ий вуйлатен. Кызыт тушто тӱрлє амаллан кєра мероприятий-влак огыт эртаралт.

Клублашке тӱҥ шотышто йоча да кокла ийготан ӱдыр-рвезе-влак коштыт. Нуным спорт модмашлан туныкта. Мутлан, тыште бокс, каратэ, рукопашный кучедалмаш вияҥыт. Отечествым аралаш ямдылалтше-шамычат кумылын коштыт. Футболла, баскетболла, волейболла модшо-влакат улыт. Тыште тыгак боевой единоборство дене заниматлаш сай тренажёр пєлемым келыштареныт. Спорт ӱзгар ситышын уло.

 

Кумданрак — «Марий Эл» газетын
2018 ий 27 мартыште лекше номерыштыже лудын кертыда.

Е.Эшкинина.

Опубликовать в Одноклассники

Добавить комментарий