27 мартыште Марий Эл правительствыште эртыше Россий Банкын коммуникационный сессийже окса-кредит политикым кучылтмо йодышлан пӧлеклалтын. Тушто регионым вуйлатыше Александр Евстифеев лийын.
Сессийым почмо годым А.Евстифеев Кемерово оласе ужалыме рӱдерыште лийше пожарым кугу трагедий семын аклымыж нерген ойлен да тушто колышо-влакым шарныме лӱмеш ик минут шып шогаш йодын.
Регионысо банк-влакын пашашт нерген ойлымо годым А.Евстифеев икмыняр ситыдымашым палемден: кредит шотышто кугу процент ставке ончычсо гаяк кодын, физический лица-шамыч дене паша начарын шукталтеш, калыкын финанс грамотшылан тӱткыш шагалрак ойыралтеш.
«Банк системе тыгай принцип дене пашам ышта: шинчена, клиентын оксам кондымыжым вучена. Каласыза, калык кредит деч моло могай банк продукт дене пайдалана? Мутлан, самырык тукым. Вес теме: чыла гаяк кредитым вес регионласе кредит организаций-влак пуат. Молан шочмо республик деч моло регионлаште кредитым налаш йӧнанрак? Молан потенциальный клиентда-шамыч вес регионыш кудалыт?» – йодышым тура шынден Марий Элым вуйлатыше.
Александр Евстифеев банк секторын социальный сферыште пашам начарын ыштымыжымат ойыренак палемден.
«Кодшо ийын республикыштына «Россельзозбанк» гына социальный позицийым ончыктен, молышт тиде направлений дене нимом ыштен огытыл. Тидым калыкат, озанлык-влакат, регионын кучемжат ужеш», – палемден тудо.
Александр Александрович финанс тӧнеж-влакын регионысо пӧлкаштым вуйлатыше-шамычлан банк обслуживанийын качествыжым яллаштат саемдаш темлен.
«Шкенан граждан, банкын клиентше-влакым пагалаш кӱлеш. Банкомат дене кылдалтше йодыш республикыштына моткоч пӱсын шога. Ялыште илыше шагал огыл еҥлан, оксам кидышке налаш манын, банк картшым олашке кудалше-влаклан пуэн колташ логалеш», – манын тудо.
Регионым вуйлатыше банк-влакын «Мир» у системыш куснымо шотышто пашам чолганжак огыл ыштымыштым шылтаренрак палемден.
«Шуко ыштыме, но эше пеш шукылан тӱткышым ойырыман. Вуйлатыше семын веле огыл, экономический правосудий дене ятыр жап пашам шуктышо айдеме семынат, плюсда ден минусдам, проблемыдам сайын палем. Но услугыдан качествыжым саемдаш кӱлеш. Мый тендам экономикыште чолгам да тазам ужнем. Финанс услугым пуэнак шогыза, регионысо озанлык-влаклан оҥай лийза», – тыланен А.Евстифеев.
Сессийыште тӱҥ докладым Россий Федераций Рӱдӧ Банкын Юл-Виче тӱҥ виктемжын начальникшым алмаштыше Г.Комиссаров ыштен. Тудо Юл кундем округысо банк секторын пашажым иктешлен, Россий Банкын информаций политикым эртарыме, тыгак озанлык пашам шуктышо субъект-влак деч сай вашмутым вучымо дене кылдалтше йодыш-влакым лончылен.
Республикысе бюджет политикын кызытсе состоянийже да ончыкылыкшо нерген Марий Эл финанс министрын икымше алмаштышыже А.Торощин каласкален.
Марий Эл Республик вуйлатышын организаций-аналитике виктемжын уверже негызеш М.ИВАНОВА ямдылен.
