Шукерте огыл Параньга районышто сонарзе-влаклан кум кужытан таҥасымаш икымше гана эртен. Тудо республик кӱкштан лийын манашат лиеш, вет участник-влак моло район гычат лийыныт.
Нуно Алашайка ял воктенсе пӱяшке нуно чумыргеныт. Кум еҥан команде-влак кум кужытан эстафетыште таҥасеныт. Икымше кужытышто капканым вераҥденыт, весыште — ечыш шогалын, 90 метрым куржыныт, кумшышто — ончылгоч палемдыме аланыш миен шуын, пӱясе ийым кум вере проленыт…
Таҥасымашке шым команде лектын. Марий Турек гыч эсогыл кок команде толын.
Жюрин иктешлымыж деч вара рашемын: команде-влак коклаште икымше верыш Параньга посёлко (В.Сушкин, А.Чешев, А.Сайфутдинов) гыч толшо коллектив лектын. Кокымшо верым Параньга районысо верым Яҥгетсола ялын командыже сеҥен налын. Кумшо вер Марий Турек посёлкын сонарзыже-влаклан шыргыжалын.
А теве личный зачётышто Параньга гыч Александр Чешаев сеҥен. Кокымышо ден кумшо верыш Параньга гыч Валерий Сушкин ден Марий Турек гыч Владимир Яковлев лектыныт. Таҥасымашын тӱҥ судьяже Махмут Бурхановын палемдымыж почеш, кугу таум спонсор-влаклан каласыман. Нунын полышыштлан кӧра ойыртемалтше-влакым сай пӧлек дене палемдаш йӧн лийын.
С.Носова.
