Ик ӱдырамашын неле, но тыгодымак оҥай илыш корныж нерген каласкалынем. Писатель семын возен ом мошто, но тыршен ончем.
Кажне айдемын – шке пӱрымашыже. Сар тӱҥалмеке, Настачи акаят йӧратыме марийжым сӧй мландыш ужатен. Шкеже кок йоча – ӱдыр да эрге- дене кодын. Илыш кечын нелемын толын. Йоча-влакым пукшаш нимо кодын огыл. Нуным чаманен, котомкам налын, лӱдын-лӱдынак, тӱшка озанлыкын уржажым шолышташ каен. Тудым шурен, шочшыжо-шамычлан шӱрым шолтен пукшаш шонен.
Шолышт кондымыжым пеш писын ужын шуктеныт да тунамак чогеныт. Тыге Настачи акайым лу ийлан четлык коклашке шынденыт. Тиде Татарстанын ик ӱдырамашыже лийын. Тудын дене пырля Марий Элынат шагал огыл ӱдырамашыже ик-кок килограмм уржам шолыштмылан шинченыт. Мемнан ял гычынак кудытын лийыныт. Таче кечылан иктат кодын огытыл.
Сар пытымеке, Настачи акайын марийже шке суртышкыжо пӧртылын. Ача толмылан йоча-влак моткоч йывыртеныт. Нуным родо-тукымышт онченыт. Ватылан эше шуко шинчыман, а ӱдырамаш деч посна илаш неле манын, пӧръеҥ вес ял гыч пелашым конда. Тудо ӱдырамашын ик ӱдыржӧ лийын. Кугыватын да изватын икшывышт пырля кушкыныт. Извате эше кум эргым ыштен. Вате ден марий чыла йочам йол ӱмбаке шогалтеныт.
Жап эртымеке, Настачи акайым эрыкыш луктыныт. Тудо Марий Элын ик ялышкыже марлан лекше ӱдыржӧ деке каен. Кеҥежым Настачи акай марлан лекме ялышкыже Сабантуйыш толын. Марийжын суртышкыжо пурымыжо шуын, но капкам тӱкылымӧ лийын. Тидым мыят ужынам. Настачи акайын еш дене илыме сурт йыр коштмыжо кызытат шинча ончылнем.
Айдеме ила-ила да шоҥгемеш. Изватынат ӱмыржӧ шуын. Но пӱрымаш айдеме илышым туге савырал шында – ӧраш веле кодеш. Настачи ден марийже угыч ушненыт, ӱмырышт шумеш пырля иленыт.
Т.Семёнова.
Марий Турек район,
Марий Купто ял.
