Йоча да самырык-влакын усталык полатышт пеленсе «Серебряные струны» ушемын участникше-влак Республикысе онкологий диспансерыш концерт дене миеныт.
Самырык артист-влак гитар сем почеш Юрий Антоновын, Булат Окуджаван шошылан пӧлеклалтше мурыштым муреныт да тидын дене нуным ончаш толшо калыкын шӱм-чонжым тарватеныт.
Онкодиспансерын кум отделенийыштыже эмлалтше пациент-влак йоча-шамычлан лирический кумылым пӧлеклымыштлан шокшын тауштеныт.
– Пагалыме зритель-влак, мый тыланда врачлан ӱшанаш, чакныде эмлалташ тыланем, – манын волонтёр Ирина Стояновская. – Тиде корным мыламат эрташ логалын. Тыште мыят эмлалтынам, сандене ӱшанен илаш кӱлмым сайын палем.
М.ИВАНОВА.