Марий Элым вуйлатыше Александр Евстифеев «Пенсионер-влакын российысе партийышт социальный чынлык верч» политический партийын Рӱдӧ советшын председательже Владимир Бураков дене вашлийын.
Ваш мутланыме годым нуно кугурак ийготан тукымлан социальный, медицине полышым пуымо дене кылдалтше йодыш-влакым лончыленыт.
«Жапым муын, регионышкына толмыланда тауштем. Тендан вуйлатыме партий илышыште кугу верым айла. Марий Элысе калыкын кугурак ужашыже сулен налме канышыш лекме ийготыш шуын. Тидыже кучем велым нунылан утларак тӱткышым ойыраш кӱлмӧ нерген ойла. Нуно эше чыланат пеш чолга улыт. Регионыштына ветеран-влакым ушышо икмыняр мер организаций пашам ышта. Ме коклан вашлийына, да социальный чынлык темым, содержанийым нуно чын умылат», – манын регионым вуйлатыше А.Евстифеев.
Политический партийым вуйлатыше В.Бураков организацийын пашаже да проектше-влак дене палдарен. Поснак кугурак ийготан еҥ-влакым пагалыме шотышто наций-влак кокласе программым ыштыме нерген радамлын каласкален. Тылеч посна республикысе кучем-влакын илалше еҥ-влак дене кылым ыштыме шотышто сай пашам шуктымыштым палемден.
«Те проста калык дене вожылде, лӱдде вашлийше-влак кокла гыч иктыже улыда. Ме тидым эскеренна. Те нунын дене эрыкын мутланеда. Тиде сай, молан манаш гын тыге веле калык тендам колаш да колышташ, пашадам пагалаш тӱҥалеш. Тидымат шотыш нальым: шукерте огыл Волжск оласе ужалыме рӱдерлаште айдемын тазалыкшым аклыме, вӱрысӧ сакырым, вӱргорно давленийым висыме да врач консультацийым пуымо акций эртыш. Тиде – калык дене пашам ыштыме уда огыл йӧн», – палемден Владимир Бураков.
Тылеч вара А.Евстифеев ден В.Бураков В.И.Ленин лӱмеш тӱвыра полатыште оласе калык дене вашлийыныт.
«Таче республикын социально-экономический вияҥмашыж дене кылдалтше икмыняр йодышым лончылышна. Кугурак ийготан-влак дене эреак кумылын вашлиям, молан манаш гын нунын илыш ончалтышышт, опытышт шергакан. Нуно республикыште мо пайдале ышталтеш гын, чылажымат поро кумылын вашлийыт, сандене полышышт, каҥашышт, акышт моткоч кӱлешан. Вашлиймаште калыкым Россий Федераций Президент Владимир Путинын Посланийыште палемдыме задачыже-влак дене палдарышым. Нуно шукталтышт манын, Марий Эл Правительстве мо кертмыжым чыла ышта», – журналист-влаклан интервьюм пуымыж годым вашлиймашым иктешлен А.Евстифеев.
Республикым вуйлатыше вашлиймашке толшо-влаклан сай кумылым да пашам тыланен, а Пенсионер-влакын российысе партийыштым пашам тыршен ыштыше организаций семын палемден.
Марий Эл Республик вуйлатышын организаций да аналитике
виктемжын уверже негызеш М.ИВАНОВА ямдылен.
