МЕР ИЛЫШ ДА ЙӰЛА МЕР КАҤАШ

Мер илыш: Кировышто — форум, Марисолаште — слет

Марий Мер Каҥашын вуйвержын черетан погынымашыже эртен. 

Каҥашыме ик эн тӱҥ йодыш Марий форумын шошым эртышаш  сессийыжылан пӧлеклалтын ыле. Тудым Киров олаште вӱдшор (апрель) тылзын 13-14 кечылаштыже эртараш палемдыме. Тидлан пашаче комиссийым ыштыме да тушко пуртышаш еҥ-влакым рашемдыме. Нунын коклаште марий оньыжа Эдуард Александров, тыгак Валерий Мочаев, Игорь Садовин, Александр Макаров,  Алексей Кудрявцев, Владимир Унженин. Кызыт сессийыш кайышаш еҥ-влакын спискыштым чумырат.

Вес йодыш тений кеҥежым Россий кӱкшытан Марий самырык тукымын Х слётшым эртарыме дене кылдалтын. Тудым сӱрем (июль) тылзыште Шернур районысо Марисола кыдалаш школышто эртараш мутланен келшыме. Ты шотыштат пашаче комиссийым чумырымо. Слётлан ямдылалтме пашам  шукташ, вуйверын лукмо пунчалже-влакым илышыш шыҥдараш оналмаш Валерий Мочаев ден самырык-влак дене пашам ыштыме комиссийым вуйлатыше Михаил Григорьевлан ӱшаныме.

Иктешлен  каласаш гын, марий мер илыш икшырымын кая, тудын еҥже-влак тӱрлӧ погынымашым, каҥашымашым эртарат, ончыкылык илыш нерген тургыжланат, молымат у пашалан таратат. Мер Каҥашын тарватыме йодышыжо-влак мыняр-гынат илышнам тӱзаташ, тӱрлӧ мероприятий дене пойдараш  полшат, кумылнам нӧлтат, тӱшка пашашке ушнаш кумылаҥдат.  Марий форум ден слёт лач тыгай шӱлышан улыт.

С.Носова.
Фотом Мер Каҥашын сайтше гыч налме.

Опубликовать в Одноклассники

Добавить комментарий